الكورونا بزمن صدام حسين ، خوية لا ترفع صوتك لا يسمعونا و تفضحني*!!

          

 الكورونا بزمن صدام حسين ، خوية لا ترفع صوتك لا يسمعونا و تفضحني*!!

   

بعيداً عن العنتريات وكلام فاضي لازم انطبق المثل الشعبي اللي نستخدمه على طول:

أگعد أعوج مو مشكلة بس أحچي عدل.
گهوة من گهاوي بغداد و لقاء صديقين واحد عراقي أصيل ومو ملون والأخر( الرفيق چخيور) يومية شكل يعني وية الهوا ومتلون سطعش لون و لون!.
+يعني ما أفتهمت شتقصد بهالمثل؟؟
- يعني الله عليك يا چخيور انت من چنت رفيق حزبي بذاك الوكت وهساع عضو بحزبكم الديني ومرتبطين بأيران ، شتشوف لو بذاك الوكت وانتشر هالكورونا شكان أيصير وشلون كانت الحكومة تتصرف!!؟
+ اولا نصي صوتك ، تريد تورطنا ،اخوية اني هسه مسعؤل چبير وانطوني شهادة الماجستير بالتفلسف!! ، وبيني وبينك أنا أمسجل ( سجين سياسي و من معتقلي رفحاء) نعني أخذ ثلاث معاشات مالة السياسيين و مالة الرفحاويين و مالة الحشد الشعبي هذه عدى الأكراميات من الأخوة بالجمهورية الأسلامية (جزاهم الله الف خير ) ، على كيفك تريد تفضحني و تگطع رزقي و رزق جهالي ، خليها سكتة يا خوي الله يرضى عليك دنيا وأخرة خليني عايش بالربيع والله يديمها على أمة محمد !!.
- تقصد بالفسلفة .. چخيور من انهجم بيتك يا ماجستير يا بطيخ انت ما أمكمل غير محو الأمية! ، وبعدين الى دخول الأمريكان واحتلال العراق انت رفيق حزبي و مسؤول عن قطاعين من قطاعات مدينة صدام ، العفو قصدي مدينة الصدر!..
+ أوهوووو ، (أگله تى ، يگلي بى)..اگوله نصي صوتك عمي انا اليوم مسعول العلاقات الخارجية جواز سفري دگلوماسي ( دبلوماسي) و احچي فارسي بلبل ما دا أتشوف أفراد الحماية وسيارتي دفع رباعي ويوميا رايح جاي للجمهورية الأسلامية والعام اللي فات حتى قابلت المرشد السيد خامنئي (قدس الله سره) وصاير مطبع بطبع اهلنا هناك حتى نسيت الأكل العراقي و گمت اخرب عالفسنجون و جوجه كباب و بلو شوشتري، و قورمة سبزي و زردة و ساهون ، اكلهم غير أكلنا ، يايابة عالپاچة مالتهم !! أصلا تخبل و غير طعم و ترتيب!! ونسيت أخبرك عندي ثلاث نساوين هناك عند اهلنا وكل زوجة بمدينة من مدن الجمهورية الأسلامية ، حطني على يمناك وبعدني شباب تره حتى هذا الصبغ اللي على شواربي وراسي حاطهن للواهس .. مو غير شىء .. چا شلون؟؟.
- من هاي اشوفك تسحب خارج يا چخيور وگايم بيك گازگيت وصاير تخبط دهن و ماي..زين ، وان شاءالله شوكت تاخذ الدكتوراه بالفسنجون؟؟.
+ الله كريم كلشي بوكته!...( طبعا عُبرت على چخيور و ما شعر إن صاحبه ناصب عليه!).
- بس ما جاوبتني على سؤالي : بذاك الوكت من چنت رفيق حزبي و أربع و عشرين ساعة لابس الزيتوني ومسدسك من نوع طارق بحزامك وشايلك ثلاث اقلام وكل قلم بلون و صورة صدام حسين على گلبك وهم بالألوان ، لو منتشر الكورونا بالعراق برأيك شنهو كان أجراءاتكم؟؟؟.
+تريدني أحچي عدل وأريح ضميري لو أحچي صفح و أسطر أكاذيب؟؟؟.
- أكيد أريدك تحچي عدل..
+لعد خليني أريح ضميري و شيصير خلي أيصير ، ترة لا تشوف وضعي آلآن ، ياحسرة على هذنيج الأيام اللي كانت دولة حقيقية بكل المعاني:
لو نفترض هذا الوباء بزمن صدام تدرون چان شسوه حسب توقعاتي:

١.حظر تجوال مية بالمية بدون اي استثناء في عموم العراق لمدة ١٤ يوم على الاقل واللي يشوفوه بالشارع ياخذوه للفرقة الحزبيه والرفاق يستلموه او ينعلون ابو الخلفه ذاك الوكت المواطن يظل يخاف على روحه حتى من يطلع من الهول للاستقبال.

٢. توفير الحصة التموينيه فورا بكافة انواعها مع حليب الاطفال ومبلغ من المال الاستلام من الوكيل.

٣. قطع الحدود مع الدول كافة السعوديه ايران تركيا سوريا الاردن وخصوصا ايران اكو گواد يدخل لو يفرض نفسه!!!؟

٤. الالتزام بتعليمات وزارة الصحة وطرق الوقاية ولبس الكفوف والكمامات واللي يلگفوه بدون چفوف ولا كمامة ياخذوه دورة ضبط يسمطون ابو ابوه يظل يلبس الكمامة والچفوف حتى من اينام. ويگدر صيدلي يغلّي سعرهن ياخذوه ايشربوه چاي بمديرية الأمن ربع ساعه يرجع يكتب لافتة عالصيدلية "كل شيْ مجاناً", وچان صارت حملة القائد لتوزيع المواد الطبية والكفوف والكمامات مجاناً والتنصيع العسكري واتحاد نساء العراق يتولون التصنيع و التوزيع؛ والكمامة بيها صورة القائد؛ وكلنا فداء للوطن.

٥.تعفير المناطق صباحاً ومساءاً.

٦. البحث مع الدول والصحة العالمية لغرض الحصول على العلاج بأسرع وقت...

٧. تخصيص قطع أراضي لجميع العاملين من أطباء وممرضين والعاملين بالمجال الصحي ، وتخصيص سيارات:

جكسارة للاطباء

و تاهو للمعاونيين الصحيين

وكيات سبورتنج للممرضات وللمضمدين الصحيين.

منح نوط شجاعة للعاملين في خط الصد الاول.

٨.محاسبة المقصرين من العاملين في المجال الصحي

بعد ١٤ يوم راح تشوف الموقف الوبائي:

بغداد (صفر)

المحافظات (صفر)

عدد المصابين (صفر)

عدد الراقدين (صفر)

عدد الوفيات (صفر)
أودعناكم أعزائي والى اللقاء بسالفة أخرى.والف شكر للرفيغ!( چخيور ) على صراحته وأعتقد لأول مرة بحياته حچى الصدگ ، يا سبحان مغير الأخوال ، راوي الموت يرضى بالسخونة!!.
أخوكم / رئيس التحرير
*اعلاه رسالة من الصديق العزيز (أبو علي) من بغداد وحديثه المطول مع الرفيق الحزبي سابقا (الرفيق چخيور) وعضو قيادي بحزب ديني موالي لأيران في الوقت الحاضر.. ودگ عيني دگ و سلمتهم يا أم حسن و روح يا معلم!!.

  

     

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1158 زائر، ولايوجد أعضاء داخل الموقع