خلونا أنقارن بأنصاف بين نوري المالكي و المطرب المصري محرم فؤاد!!!

التفاصيل

تم إنشاءه بتاريخ الإثنين, 14 أيلول/سبتمبر 2020 16:01

كتب بواسطة: جلال جرمكا

خلونا أنقارن بأنصاف بين نوري المالكي و المطرب المصري محرم فؤاد!!!

نوري المالكي وكان أيام زمان نعني قبل أحتلال العراق من قبل ( الشيطان الأكبر و الجمهورية الأسلامية ) يحمل أسم اخر خوفاً من الأجهزة الأمنية العراقية من كان بأيران وبعدين من أستقر بالشام وحصراً بمنطقة السيدة زينب!.

كان الأخ الماكي يحمل أسم( جواد المالكي) وذلك لأخفاء هويته و شخصيته وبالحقيقة من حقة ان يبدل أسمه خوفا على سلامته.
بس أحچي ضميري من كان يستلم راتبه(150$) من المخابرات السورية كان يوقع بأسمه الحقيقي.
طبعا أخوان هذه مسؤلية وأمانة و تواقيع و هات وخذ ، لعد شلون قابل خان چغان لو شنو؟؟
كان موظف صغير بتربية الحلة و راتبه على گده ويادوب تكفيه وتكفي عائلته وبعدين بقدرة قادر يصير:
- رئيس الوزراء.
- القائد العام للقوات المسلحة.
- بيده كل خيرات العراق من البترول وغير البترول.
- بشخطة قلم كان يصرف الملايين من الدولارات والمن مايريد.
- خلى بالعراق عدد من (فريق وفريق أول ركن) أكثر عددا من جيوش الصين الشعبية وأمريكا وروسيا الأتحادية و دولة جيبوتي العظمى التي لاتغيب عنها الشمس!.
الغريب بالأمر ان الرجل ماخدم العسكرية ولايوم ( نعني كان أفرار على طول) ولا ترأس دائرة أو قسم ولاحتى رئيس ملاحظين ولا حتى ملاحظ!!.
والله لو لاگفك أبو عداي الورد لطير أذنك اليمنى كونك أفرار و مهزوم من خدمة العلم العراقي ولكن هروبك الى ايران كان السبب وإلا كان حصل و نص! وكان شمحلاك بتك أذن على شكل تلك لايت بالسيارات وهذه فضيحة وين ما چنت تروح يگولون أجه التك أذن وراح التك أذن ويسلم عليك التك أذن.. يايابة شلون فيلم هندي!! عندك بخت يا أبو أسراء الورد وفلتت..
أول ايام أحتلال العراق خطف أحد ضباط الشرطة ( لواء) وابنه و قتلهم أمام الجميع بمسقط رأسه (طويريج) والسسب كان هذا الضابط المسكين ضابط أمن بديرته ويلاحقه بأستمرار و الضابط المغدور كان أسمه ( عدنان نبات) من خطفه أبو أسراء كان المسكين مدير شرطة بغداد / الكرخ.
خاطب أهله وناسه بقضاء الهندية وگال:
أذا حالفني الحظ وصرت قائمقام أني أعرف شلون أطور المدينة!!!.
عمي أبو أسراء يا قائمقام أنت راح تصير الحاكم العام وچبير العساكر بعموم العراق!!.
صار رئيس لوزراء العراق من 2006 ولغاية 2014 وخلال فترة حكمة حصلت بلاوي و مصايب وصار العراق ولاية بطيخ بكل المعاني:
- احتلال ارهابيي داعش مساحات واسعة من مدن وقصبات العراق في المقدمة مدينة الموصل.
- فرغ خزينة العراق و صار ابنه (احمد ) ونسيبه (ابو رحاب) والمقربين منه مليونيرية وما أبالغ اذا كلت قسم منهم صاروا مليارديرية وبالدولار.
- ضخ بالهالميارات الى جمهوريتهم الأسلامية الى ان الله گال كاااافي.
نعني بأختصار دمر العراق واقصاد العراق و سمعة العراق و جيش العراق و خرب ما بني قبل الأحتلال...تصفيق لأبو اسراء الورد!.
العالم عدى قلة قليلة من المستفيدين ينتقدون أبا أسراء كودن عنده رقم قياسي بالسرقة وعدم قدرته على ادارة البلاد وتدميره من كل النواحي... وفي نفس الوقت أكو من يحسده على صلاحياته و ثروته وثروة المقربين منه و منصبه خلال ثمان سنوات!!.
بالمقابل أكو ناس و وسائل اعلام تحسد وتنتقد المطرب المصري ( محرم فؤاد) و يگولون عنه:
- لعب شاطي باطي وما خلى حسرة بگلبه!!.
طيب خلونا أنشوف شسوى صاحب أغنية ( رمش عينو)!؟؟قريت بالمجلات العنوان التالي ويه شوية تفصيلات أرسلها لي صديق من قلب بغداد:
محرم فؤاد ...اكثر انسان دلل نفسه ،گولوا اشلون؟؟؟
اول زوجة اله هي تحية كاريوكا ...الي كانت في عز نجوميتها ...وتشبه الكاهي بالگيمر - طلگها واتزوج وحده لبنانية اسمها ماجده بيضون ...وهاي كانت ملكة جمال لبنان
- بعدين اتزوج ميرفت امين اول وگعتها بالسوك الي كانت تشبه الزلابية
طلگها واتزوج صباح ...صبوحه الكروانه ...الشحرورة...قطعة الحرير و النعومة ، بس مع هذا ما توقفت المسيرة النضالية لهذا البطل طلگها و ا تزوج سهير رمزي رمز الانوثة والجمال و الدسومه الي تشبه زند قوزي هرفي على التمن
گول برد حيله ...ابد... لا...
- رجع للبنان واتعرف على وحده اسمها جورجينا رزق ...الي كانت أستوها فايزة بلقب ملكة جمال العالم ... وغنالها (داري جمالك... دي العيون بصاصه ...داري جمالك دي الرجال قناصة) وهي تتمرگص گباله...
ولك يا استاذ محرم وين اكو قناص احسن منك بالعالم كله
زين بهيج حالة المفروض يگول يالله كافي ...اني حزت على وحش وبطل الجمال كله
لكن البطل ...ابدا لم يوقف مسيرته الظافرة ،ترك الجمال اللبناني الفينيقي
و اتجه للفرعونية.... ملكة الرقص الشعبي عايدة رياض اول بداية طريقها ....كانت تشبه الحلقومة
اتزوجها وطلگها و ورى فترة ...گال لنفسه يالله حسن الختام
بس يا ختام يا احلام... ....وهو يمشي اتعثر بمذيعة حلوه اسمها منى هلال ... و اتزوجها -
ولو ما يد القدر التي خطفته عام ٢٠٠٢... وملحك على ياسمين صبري كان ممكن يضمها للالبوم مالته... وكان ابو هشيمة يلكط حصو وراه
يا ناس يا عالم:
أكو نسبة و مقارنة بين الأخ المالكي و المسكين محرم فؤاد؟؟؟
الأول دمر بلد بمعنى التدمير والثاني نعني المرحوم ( محرم فؤاد) ياترى تعدى وسرق المال العام لو اذى وطنه و شعبه ( مصر ) قيد شعرة لو رفع نواب ضباط هاربين من الخدمة العسكرية الى رتبة عميد ركن أو خله مضمد وزير للداخلية و ضابط أمن فاشل وزيرا للدفاع وفوكاها وزير ثقافة!!؟
الأخ محرم الورد كل مشكلته كان نسوانچي و ما يدعي انه متدين ولا لبس في يوم من الأيام محبس فضة ولا شال سبحة ولا صلى على التربة.
محرم كان صاحب موهبة وحنجرة ذهبية والأخ المالكي هابياض!!.
حرامات الفنان محرم مات وإلأ كان ضيفناهم ببرنامج (ستوديو الفن والمواهب) من اعداد و تقديم ( البهلوان حسين الشهرستاني و اخراج البروفيسور إبراهيم الجعفري) حتى نختبرهم ياترى منهو الأحسن؟؟.
أتحدى المالكي أذا گدر يجر سويحلي لو طور محمداوي من اغاني (فرج وهاب) لو بوذية من بوذيات المطرب أبن بلدته ( عبدالأمير الطويرجاوي) وخلي هو يختار (الحياوي لو العنيسي لو المثكل)* مو مشكلة والله فلا يگدر يفك حلگه !!.
لعد هو بيش متفوق ..؟؟نعني بس بتدمير العراق وسرقة امواله و تخريب النفوس؟؟!.
لاء خالي لاء هذه ما ينلبس عليها ولا حتى نص عگال!!.
خوش لعد عليش هالحسد و عليمن والأهم محرم كان يتزوج برضاهن وعلى سنة الله ورسوله وكل زيجاته كانت بالعلن ومن غير تستر و لف و دوران والأهم ما أدعي انه من سلالة الرسول (ص) و لا اعتدى على حقوق الاخرين على العكس من ابو اسراء الورد ، محرم كان له حسناته و ايجابياته بالحياة كان يطرب الملايين واله الملايين من المعجبين والمعجبات و يفتر بكل العالم بوحده لا افراد حماية ولا سيارات دروع ولا هم يحزنون!.
أتحدى أبو اسراء اذا گدر يطلع لأي شارع من شوارع العراق، اذا كان بالصيف والله العظيم ليمطروا بطن من گشور الرگي والبطيخ و نص طن من الطماطة المعفنة و تعال وشوف المنظر!!.
اما اذا كان الفصل شتا لا ليرگعوا بربع طن من البيض الفاسد المستورد من جمهوريتهم الأسلامية وشوفوا المنظر اللي مايشتري خلي يتفرج!!.
أما الأخ المرحوم (محرم فؤاد) يگدر يتمشى بالشورت والفانيلا والمعجبات يشمرن عليه ورود و يسمعوا اجمل الكلمات ومن يدري يجوز يشوفلة قطعة كرميل بالقشطة ويتزوجها عند اقرب مأذون شرعي ، وما قصرت يا محرم الف تالاف عافية !!.
يا أبو أسراء ماعندك موهبة الغناء مومشكلة ولكن أرجع و شارك (ركضة طويريج) لأنه أيام زمان من چنت ( تحط الدشداشة بحلگك) وانت حافي تطلع أول على الجميع و ماكان اكو منافس الك ، من استلمت المسؤلية وصرت چبير العساكر نسيت وتناسيت هذيج الركضة والله حرامات و الف وسفة فعلاً كرسي الحكم يجعل من الديك حمارا!!.
اخوان بصراحة:
لاء عمي لاء فرق جبير بين السما ولارض وخلونا ساكتين و:
رمش عينه اللي جارحني. رمش عينه
رمش عينه اللي دابحني. رمش عينه
مين يا ناس .يحكم ما بين قلبي وبينه؟؟
رمش عينه االلي جارحني رمش عينه.!
بالأخير الله عليكم ياهو منهم كان محظوظ أكثر؟؟ وياهو منهم أذى البشرية وجوعهم ، محرم فؤاد المسكين اللي كان مايگدر يعيش بدون عسل و گيمر لو أبو أسراء الورد (قدس الله سره وابقاه ذخرا لحزبه ومريديه) وجاب كل البلاوي لعراقنا المحتل!؟؟.
نم قرير العين يا محرم ابن فؤاد والله فزت بالضربة القاضية لو يعد الحكم للألف فلا يتحرك منافسك ابو أسراء الورد ، والمهم لاتصور اكو واحد يكرهك ولكن حسدوك نعم بالضبط وأعتقد من حقهم ، عمي انت هم الله يرحمك سويتها بلا ملح والله ما بقيت لا گيمر ولا عسل ولا فراولة ولا زنود الست ولا هم يحزنون ، يزي عاااااد ، كااافي كان انطيت مجال لغيرك!!!.
خوش ماي أبو أسراء الورد ... تفضل أستريح!!.
أودعناكم عيوني الى سالفة أخرى إذا الله خلانا طيبين.
أخوكم / رئيس التحرير
* أطوار اغاني.

• < السابق
• التالي >