وينك يا ملا عبود الكرخي؟؟؟

                  

ثمان عمال مع الحارس ومشغل المولدة كنا نشتغل بمعمل (مال جرش) صاحب المعمل صائم مصلي ويخاف الله كلش كلش اول شهر لنا بالعمل جمعنا وقال اخوان اني لازم ابطل اثنين منكم لان المعمل ما يتحمل هالكد عمال وجاي يخسر واني ما اكدر اختار لان محتار منو الي راح ابطله لان كلكم عدكم عوائل وكلكم اعزاز والله اعزاز !! فأختاروا اثنين منكم يبطلون !!

طبعا احنا وجوهنا صارت صفر والرجيف لزمنا لان فكرة ان تصبح عطال بطال وانت عندك عائلة كارثة !! بساعتها محد كدر يجاوب الحجي ابو المعمل الخوش ادمي وسكتنا كأننا على روؤسنا الطير !!صفن صفنة مؤمن تقي نقي يتأمل ويتفكر ويتدبر امر الرعية وقال خلص ابقوا كلكم وحتى لو اخسر اهم شي عوائلكم بس اريدكم تشتغلون بأخلاص وتعتبرون المعمل معملكم فكلنا قلنا له بصوت واحد هذا المعمل معملنا ينور العين !!! فكنا نشتغل وقت اضافي (اوفر تايم) ولم نفكر ابدا بأن نطالبة بزيادة اجورنا وهو بدوره كان كل شهر يسوي علينا نفس الفلم !!!! وبعد ثلاث سنوات اكتشفنا شغلتين الاولى اننا قشامر كلش والثانية ان ميزانية المعمل انفجارية ويوميا يربح ملايين من ورانا استغربنا ليش هيج ايسوي ويانا وسألنا قبل ما انبطل !! فقال اني لو كايلكم ان المعمل يربح ملايين كان طالبتوني بزايدة الاجور وطالبتوني بعمال اضافيين بس ما دام انتم معتقدين اني راح ابطلكم واني مان عليكم ومتفضل فما راح اطالبون بشي ابد! وترضون بالقليل!!!!

الحجاج الي بالحكومه اقطاعيون ارستقراطيون يفكرون بنفس طريقة الحجي وزرعوا بعقول الناس ان العراق لا يملك اموال ويوميا يهددون راح انبطل العقود راح نقلص رواتب الموظفين حتى الموظف ما يطالب بزيادة الراتب و الخريج ما راح يطالب بتعين والفقير ما راح يطالب بالغذائية ولا بسكن لذلك قال قديما الشاعر عبود الكرخي:

  
ذبيت روحي عالجرش وادري الجرش ياذيها
ساعة واكسر المجرشة وانعل ابو راعيها

https://www.youtube.com/watch?v=fl6Y1zY-7HY

هسة شوكت تجي ساعه عالحكومة وننعل ابو راعيها؟؟؟؟

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

501 زائر، ولايوجد أعضاء داخل الموقع