شحچيلك يليل

التفاصيل

تم إنشاءه بتاريخ الأحد, 20 نيسان/أبريل 2014 17:45

كتب بواسطة: حذام الحداد

حذام الحداد

غَريبه وروحي تنشدني أنا من مـَنْ

عگب غدر الـزمــن بيمَــنْ أنا مــن

وأسهر وعِد نجوم ليلي ما أنا مـَـن

نشدني الليل عاللي جــره بيـّـه



شحچيلك يـليـل همــومنــه كــثــار

لو أعـِـدْ عمر مــايـخــلصْ الــعـدْ

تهنَه بلا وطن وغــدينــه طـــشــار

وسفه وي روجــه أخذنـــه الـمـــدْ

وحظنـه بهالعمر ماگعد فــد يـوم

اويـا بــاب النــدگه بالوجـه ينسَـــدْ

چنَّه انمد إيدينه عونـه للمحتــاج

اوصفيـنه للمعونه إيــدنه تــنـمـدْ

أسياد بوطنَّـه هــنـاك چنَّـه نعيــش

والواطي اليوم علينه هم  تْسـَـــيّـد

وعيـن الحزن عدنه ماتكُف دمـوع

وعيـن الفرح مدري شبيهه تــرمدْ

حَسافه شگد شگينه بزرع هالگاع

وعفـنــه خيـرنه لـلغير يحــصــــدْ

وهاذ العراق الچان أبـو الـوگفـات

وحـــزام لأخوتـه بالـظهر يـنـشَــدْ

لـــمــَن ْطـاح كلهه تنـكـرت لــيـه

وما فزعله مـن تعثَّـر بـيـهم أحــدْ

ظهر معدنهم شبه مـوذهب تيــزاب

بس طاحَتْ لمعتَه ْ صار أســود

وهدَّت عالـوطــن أسراب غربــان

وخلت إبن الرافدين بـليل يتشــردْ

وزرعتْ الفـتن لجــل تفرّق بـيــه

تخاف من الشــعب لـو گام يتــوحدْ

ودم الـعراقـي غــرَّگ الگـيــعـان

وكل مال الـوطن راح وتفــرهـــدْ

أظـن ماعرفو هذا العراقي زيـــن

لو يـنذكر اســمه عــداه تـتـبــلـدْ

وياما دگَّـت على راســـه الطبـول

وراح الـليــل و ظْـلامـــه تــبـــددْ

وطنَّه ماخذ طبعَه ْمن البـــراكيـن

تجيهه ساعــه تــشــوفهه تــخـمـدْ

او لَون تلمض يموت الليــل حسرات

وتخلي العـدو بنيــــرانه يــتـبــرَّدْ

موأهلنه أهـل ثــورة الــعشـريــن

گصــوا رجــل الـعَـدّه ذاك الــحـدْ

هـدَّوا عله عــداهــم بــالـمگـاويــر

او خلَّو الطامع على ديرتــه يــــرَّد

العراقي أسمه هيبه ويخسف الگاع

والمجد منـه أخذ اســمه وتمجَّــد