لو يعدموني مثل زلخا أباب الشرجي أظل أگول الحق و ما أخاف /١٥

التفاصيل

تم إنشاءه بتاريخ الخميس, 23 تموز/يوليو 2026 09:40

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /١٥

السلام عليكم..

-وعليك السلام أبو حمودي.. تعال هنا يمنه..

جايكم... يا الله.

- الله بالخير

الله بالخير و العافية.

- البارحة ما بينت! خير ان شاءالله؟.

وين الخير من ورا هاالحرامية والجواسيس؟؟.

- بس هذه موجديدة ، من الفين وتلاثة لليوم نفس الطاسة و نفس الحمام ونفس الشكولات الزفرة ونفس السياسة والنهج اللي رسمها بول بريمر ولليوم.

صحيح و لكن الفرق انه أنكشفوا مو بس للعراقيين بل لأنحاء العالم.. مثلاً:

انطيني اية مليونيرة بالعالم(اللي بنت ثروته بنفسها) من أمريكا الى آسيا وأفريقيا عدها لباس وستيان من ذهب عيار أربع وعشرين؟؟...هساع لو حلوة هم .. بلاكد يشهد الله القرد احلى منها!.

- اكيد ماكو.

طيب وين أكو وكيل وزير طلع عنده مليارات من الدنانير والدولارات وفلل وشقق بالمحافظات وبأربيل وبالخليج؟؟.

- هم ماكو.

طيب وين أكو أمعمم حتى بأيران يسيطر على جزء جبير و راقي من بغداد و مئات السيارات الحديثة و شاحنات و كرفانات و مئات الحمايات على حساب الفقراء و المعدومين اللي عليهم حسرة ربع كيلو لحم ، وأمتيازات وغيرها بس الله يعلم شكو ماكو جوه عبايته!ويطلع بالتلفزيون ويكول ترة اني كلشي ماعندي وصدكوني كاعد ايجار!!هساع فوك كل هالفساد والهدر بالمال العام وعبالة الشعب العراقي زواج ولك بابة العراقي أمفتح با اللبن !.

- أبختي كلامك على راسي و محد يگدر يناقشك.

انت شايف واحد يمثل حزب اسلامي وعلى اساس يخاف الله وملياردير؟؟ ومو بس هو حتى نسابته وابنه واولاد عمومته و خوان زوجته مليارديرية!!.. اي عرفنا ولاية بطيخ بلاكد مو هالدرجة.. اي شوية خافوا من رب العالمين.

- ما يخافون ولا الهم علاقة بالدين و بالديانة!.

وين أكو واحد مجرد عضو بالبرلمان ياخذ زوجته للخارج ويسويلها عمليات تجميل من فوك ومن جوه وتكلف الدولة حسابات فلكية مع ذلك يصرفوله الفاتورة الى حد الدينار، هساع لو بيها مرض مستعصي أنگول حالة انسانية ومابيها شىء لكن تروح تبيض جسمها المزنجر هذه ما ينسكت عليها اطلقاً!.

- اخوية هذولة اجوي للتخريب خو مو لأعمار العراق وشنو بيدينا؟؟.

كلشي بيدينا أقلاها أنطبق كلام الرصول (ص) ومانصير شيطان أخرس!!.

- وهذه بيها فائدة؟؟.

أكيد ليش لاء؟.

- شوف أبو حمودي هالممارسات اللي بالمئات وأزيد ما يصير الها جارة غير على حد قول أحدهم: شلع قلع!!.

هو هذا اللي اقصدة وبأذن الباري نهايتهم قريبة.
- من حلگك الىباب السما..

ان شاء الله.

- چاياتك ياولد وماي بارد ترة زردومنه نشف من القهر و الحچي!!.