لو يعدموني مثل زلخا أباب الشرجي أظل أگول الحق و ما أخاف /٩.

التفاصيل

تم إنشاءه بتاريخ الأحد, 07 حزيران/يونيو 2026 16:56

كتب بواسطة: أبو حمودي البغدادي

أبو حمودي البغدادي

السلام عليكم...

-وعليكم السلام أبو حمودي الورد ..شكو ؟؟ ماكو؟.

عمي سؤالك يرادله شهر من الكلام من دون توقف!.

- لاء أقصد انطينة الزبدة.

والله هالأيام كل الحجي على عملية جبيرة واعتقال المدعو عدنان الجميلي اللي كان يشغل منصب وكيل وزير النفط لشؤن التصفية!.

- هذا شلون منصب؟؟.

والله شمدريني الحاصل هذا احد وكلاء الوزير.

-وشنو قصته؟؟.

هذا قبل أيام راحت مفرزة خاصة وكلبجوا وجابو البغداد.

-شمسوي؟؟

أمسوي بلاوي..مثلا ، ضبطوا عنده:

*أربعين عقار في بغداد وصلاح الدين وأربيل.

- يامعود كو غيرها!!.

أصبر بعدك وين ووين:

*مبالغ نقدية 10 ملايين دولار و 3 مليارات دينار عراقي.

* مصوغات ذهبية بنحو كيلو غرام.

*كميات كبيرة من الأسلحة الخفيفة والمتوسطة.

-طيب وتتوقع انه ماعنده سند و شركاء بكل هالاموال و العقارات؟؟.

لاء..أكيد عنده.

-طيب هو هسه بالسجن؟؟؟.

أكيد.. بس المفاجأة!!.

-شنهية؟؟

وهو محبوس صارت محاوله لأغتياله داخل الحبسخانه.

- هذه شلون؟؟.

يكولك أحدهم واسمه بالأحرف(ح.ث) حاول اغتياله ولكن ماتوفق.

- وعليش يغتالوا؟؟.

خوش سؤال، مو هذا اكيد أكو وراه حيتان كبار من سياسيين وغيرهم فحتى لا تنكشف أسمائهم وقبل مايودوا الى التحقيق عند قاضي التحقيق رادوا يتخلصون منه لأنه هذا متورط ويه جماعته الحرامية بتهريب واستلام عمولات بترليونات الدنانير وقطوعات نفط كانت تهرب خارج القطر!... واذا انكشفوا راح تكون اكبر فضيحة بتاريخ العراق جرت بزمان رئيس الوزراء السابق محمد شياع السوداني.

- لعد هذا هم طلع موخوش!!، أشو كانوا يكولون انه انزه رئيس وزراء و يمدحون به اثار هم اكو جوه راسه اشكال والوان!!.

لعد شعبالكم ، بابه هذولي كلهم حرامية وفاسدين شعارهم (جيب رجال يحط بالسكلة ركي) حالة و ماتتكرر لذلك شلع قلع كلهم يك حساب نعني حرامية وسراق واغسل ايدك منهم كلهم... الله يكون بعون اهلنا وناسنا، لا كهرباء ولا ماي صافي ولا تعيينات الشباب كلها عطالة بطاله و الخدمات صفر همهم الوحيد سرقة الجمل بما حمل.

خليني ساكت الشك جبير والركعة صغيرة.

-تعال ياولد جيبنة جايات وماي..و النه الله.