لو يعدموني مثل زلخا أباب الشرجي أظل أگول الحق و ما أخاف /٥

التفاصيل

تم إنشاءه بتاريخ الأربعاء, 29 نيسان/أبريل 2026 10:07

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /٥

هذا مو أبو حمودي؟؟

ليش لاء ، هو ونص.
- يا أبو حمودي تعال ، ليش مستعجل؟؟
عوفوني بدري و خلوني أروح أكعد عالشط ترة مالي خلك!.
- رحمة على والديك وهو شوكت كان عندك خلك.. تعال وأحجينة و شوية فضفض اللي عندك.
أمر لله .. شلون ما اضرب أسداس بأخماس هذا البلد انتهى و وفلا يصيرله جارة.
- رحمة على والديك ليش هذه جديدة؟؟.
لاوالله بس كل البلدان تتقدم واحنة مثل .. البعير نرجع ليورا.
- خش بالموضوع و أحجينة.
البارحة اجتمعوا الحرامية و جابولك واحد حرامي و زعطوط عمره أقل من أربعين سنة و يحطوا رئيس وزراء و قائد عام للقوات المسلحة و كلشي وكلاشي بالعراق ياترى هذا منو؟؟ ومنين؟؟ وشلون بهالعمر عنده مليارات الدولارات لو ما حرامي؟؟.
- كلامك صحيح وعالراس.
شنو الفائدة ليش ماكو بالعراق أكاديميين و اشخاص أقتصاديين و تكنوقراط حتى يجيبون هذا حتى يدير العراق!!.
- أبو حمودي و هذه كلها توجيهات و توصيات بول بريمر مشعول الصفحة اللي قسم الوظائف حسب المذاهب والقوميات.
ما اختلفنا ليش ماكو مواصفات الرجل المناسب بهذا المذهب؟؟ لاء أكو ونص بس هم يردوها أمفصل مثلهم يعني يكون ولائه الى ايران وحرامي أما يفتهم وما يفتهم هذه مو مشكلة أبدا!!.
قبل السوداني جابوا صحفي فاشل بأمتياز وخريج الدراسة الأبتدائية أنطوا شهادة جامعية من جامعاتهم و رأسا رئيس وزراء والقائد العام للقوات المسلحة و نهب البنوك وگلب بالدخل و هذاك هو يمشي بالشوارع و ويا سيارات دفع رباعي و حمايات و نافخ روحه مثل الفسيفس كأنه فاتح الأندلس!!.
- كلامك ذهب خالص يا أبو حمودي ، لا تغث روحك ترة السمجة خايسة من الراس و الله يستر من الجايات.. جاي وماي لأحلى أبو حمود شهم وعراقي أصيل يستاهل مي العين.
رحمة على ولاديك، شنسوي لازم نتحرك بأضعف الأيمان و العراق يستاهل الف تالاف تضحية مو بس كلام في كلام ولكن شنسوي ماباليد حيلة.