لو يعدموني مثل زلخا أباب الشرجي أظل أگول الحق و ما أخاف /٢

التفاصيل

تم إنشاءه بتاريخ الإثنين, 06 نيسان/أبريل 2026 17:59

كتب بواسطة: أبو حمودي البغدادي

أبو حمودي البغدادي

لو يعدموني مثل زلخا أباب الشرجي أظل أگول الحق و ما أخاف /٢

-خير أبو حمودي.. اليوم صاير نار كبرة...خير!!
منين يجي الخير؟؟
-يامعود گول يا الله..
أكو شغلات نعني الواحد يفقد صبره .. والله يا أخي أني اتعاطف ويه كل الشعوب وما يهمني دينه ومذهبه..حتى لو كان بوذي لو أي شي أخر!.
-أبو حمودي عندك شي گولها و گولت المصرييين: هات من الأخر.
على راسي.. شوف الجماعة لموا السوگ كلها ودزوها الى ايران بحجة مساعدة الشعوب الأيرانية
-مساكين هم هسة بشدة..
ما أختلفنا ولكن يا عزيزي الأقربون أولى بالمعروف والأهم مثل ما نعرف كلنا:
أيران بلد چبير:
المساحة: تبلغ مساحة إيران حوالي 1,648,195 كيلومتر مربع. وهي تحتل المرتبة الـ 16 عالمياً من حيث المساحة.
عدد السكان (النفوس): يبلغ عدد سكان إيران حالياً (2026) حوالي 93 مليون نسمة.
أحلفكم با الله يعني شكد يريدون يوصلولهم مساعادات لشعب نفوسهم ما يقارب 100 مليون؟؟.
والأهم ارسال هالمواد راح تأثر على أرتفاع المواد بالسوگ عندنا .. اذا ما تصدگون روحوا للسوگ وشوفوا بيش قنينة الزيت قبل أيام وآلآن؟؟ ونفس الشي لبقية المواد الغذائية.
انا ابدا مو ضد مساعدة الشعوب حتى لو بتلفات الدنيا ولكن كلشي الها حدود ولازم مانتجاوز الحدود.
مو بوطننا الآف مؤلفة من عوائل عايشة تحت خط الفقر تركض و العشا خُباز ياترى مساعدة هؤلاء مو أهم ، لو أرسالها خارج الحدود؟؟.
أقسم بالله فلا أكره أي شعب من الشعوب ، أيراني ، فيتنامي ، أفغاني ، قوقازي ، صومالي ، نظرتي للجميع نظرة انسانية بحتة.
أما مزيدات و عرض عضلات والبكاء غير المبرر اعتبره مجرد تمثيل لاغير.
وهسه حقي لو مو حقي؟؟
-كلام عالراس ابو حمودي، اليوم ماتطلع منا اذا ماتشرب چاي لو بارد.
ليش لاء.. الف رحمة على والديك فد چاي من راس القوري..

أني متأكد أكو هواية ناس ما يعجبهم كلامي تره راسي راح ينفجر .. كودن اليحچي الصدگ طاگيته مزروفة!!.