الگاردينيا - مجلة ثقافية عامة - لو يعدموني مثل زلخا أباب الشرجي أظل أگول الحق و ما أخاف /١

لو يعدموني مثل زلخا أباب الشرجي أظل أگول الحق و ما أخاف /١

التفاصيل: تم إنشاءه بتاريخ الإثنين, 30 آذار/مارس 2026 22:33; كتب بواسطة: أبو حمودي البغدادي

أبو حمودي البغدادي

-الله بالخير أبو حمودي ..أشو ماكو؟؟
خليني بدردي صارلي يومين ما طالع من البيت و راح أنفجر!.
-سلامتك ..شكو شصاير ..أحچي؟؟
شأحچي؟؟ منو يصدگ؟؟ يا أخي اللي ديصير ما صاير بأي بلد بالدنيا..
-تمام لكن شنو الجديد؟؟ أشو من أول يوم الأحتلال نفس الطاسة ونفس الحمام.
يوميا خبر جديد وين هي الحكومة وحق الله بالعاصمة أكو أكثر من سطعش حكومة وكل جهة عدها مسلحين واجهزة وسجون و صايرة لخة.
-أبو حمودي رحمة على والديك ليش ما تخش بالموضوع وتخلصنة.
زين .. أسألك سؤال وجاوبني.
-حاضر
خالد مو أسم عربي؟؟؟
-طبعا وهل يخفى القمر..؟؟ أكو واحد ما سامع وأمبارك بالقائد العربي خالد بن الوليد؟؟.
طيب..شنو رأيك جاري أبو خالد من قبل ثمن سنوات خاطفين أبنه وهو طالب كلية وماله شغلة لا بالأحزاب ولا بالمذاهب ..خطفوا وهو راجع من الكلية وفص ملح وذاب؟؟.
-زين خو ما عدهم عداوة لو كان يدور طلايب و مشاكل؟؟.
اخوية أگولك متربي وأني زين اعرفه و راح جاي بدربه وأهل المحلة كلها تحبه و تحترمه ونحلف براسه والناس كلها حزينة و مابيدها شي غير الدعاء.
-زين لعد شكو..؟؟
أسمع أنطيك الزبدة: أمه وابو ما خلوا مكان.. راحوا ودورا ولا نتيجة وبعد ثمن سنوات اجته مكالمة:
انت أبو خالد؟؟ نعم أني..ما أدگولي ليش سميت أبنك خالد؟؟
حاول ابو خالد وتوسل ان ينطي نتيجة لكن المتكلم سد التليفون وهو يتمضحك وانتهى!.
-يا معود معقولة؟؟ نعني شلون؟؟.
اخوية ماتصدك تعال وشوف هذا اللقاء مع أبو خالد.. مو حقي ما أتخبل وأشكد هدومي؟؟؟.
تعال شوف وراح أروح حتى الچاي ما أشربه!!...ولاية بطيخ ، المن نشكي والشكوى لغير الله مذلة؟؟؟.