بس ... حلهه !

التفاصيل

تم إنشاءه بتاريخ الخميس, 20 آذار/مارس 2025 16:28

كتب بواسطة: ميسون نعيم الرومي

 ميسون نعيم الرومي

بس ... حلهه !

شكرا امريكه ... اشجبتي
زايره ... اوحجيه ... ملايه او اشكال
ابراطم وجه امنفخ ....
واحواجب مفتوله احبال
والسان امشرشب ... قيل او قال
(ضعنه اوهالضاع المال)
***
شكرا امريكه اشجبتي
امدگدگ وابو خنـّـيـنـَه ...
او نص انعال
وانواع النصب الما يخلص
نعم الله او عال العال
-(من هالمال او حمل اجمال)-
***
شكرا امريكه اشخليتي
حرامي او لوگي او محتال
ايحرم وايحلل بالكيف
والمهنه سيد دجال
يا حال اسأل على هالحال

***
شكرا امريكه اشسويتي
بدلتي المجرم بانذال
والدم البشارع سال
حمـَّـلنه الأطفال اهموم اثگال
اوصرنه ابقائمة الأمثال
او على هالرنه او هذا الحال
يا حال ابچي على هالحال
***
تترجاك (ترامب) اتحلهه....
-(بغداد).. الصارت اطلال
او سومر... آشور الأبطال
واطفال اللبست أسمال
اوتدعيلك بالخير الأجيال
بس حلهه.....
----------------
آذار / 2025
ســتوكهولم
--------------