يابو معاضد ذهب

ميسون نعيم الرومي


يابو معاضد ذهب

يتناثر القداح يالتمشي دلـِع
يابو معاضد ذهب
تتغاوه بالخزامه

يالورده تتناثر شذر
تطلب إذن .. حيرانه

امعسل .. اشفافك رطب
تگطر عسل ولهانه

دارت الشيله اعله الوجه
چنهه البدر بسمانه

يتباهه بالحـِنـَّـه زلف
يچوي چوي بالوانه

الدگـَّه تضوي ع الحنچ
اتخاف الحسد .. حيرانه

والشامه عَ المرمر تشع
جمره اوضوت نيرانه

حسنك يريحان الورد
ليش ازعلت ويانه؟

متغاوي يالكلك دلع
سابي سبي جيرانه

جرح الگلب يدي يضل
هذا العشگ .. عنوانه

يابو معاضد ذهب
ورده اشبگت خزامه
----------------------------
14 / حزيران / 2024
ســتوكهولم

  

إذاعة وتلفزيون‏



الأبراج وتفسير الأحلام

المتواجدون حاليا

760 زائر، ولايوجد أعضاء داخل الموقع