رساله الى ربي الخلقني

التفاصيل

تم إنشاءه بتاريخ الجمعة, 18 آب/أغسطس 2023 20:54

كتب بواسطة: ميسون نعيم الرومي

ميسون نعيم الرومي

رساله الى ربي الخلقني

شكتب يربعي اليوم عينوني

زعلان القلم هالگطع بيه

اكتب غزل

راحت للسويد او وگعت النگطه

نگطة الگشره يربي

چا بس المره مسبيه

اكتب شعر

كله تصير استاذ

اقبل صداقة

ابلحظة يرن وابكيفه الافندي

لا احم ولا دسور

مو هوالولي؟ او متسيد اعليهه

اوصفلي (حلو) تتبحلق اعيون؟

اشگد عيب اوخزي وهيه بيبيه

اوصفلي مره تتغير الالوان

والهمز واللمز يمكن سحاقيه

اكتب حزن يبدي النقد وابترتيب

ضوجتنه تره مو كافي لطميه

اكتب عالوطن واللي جره اوصار

اچلاب السياسه امعذربه فرحانه بالعدهه

تاخذ صور واتدزهه

ع العراق .. يحتج العراق:-

تلچمين الجروح اوكلهه هالتلسع

شراييني اتگـَطعَت خيرات اتفرهت

ولدي جياع اوصفوْ بالبلدان

طردوهم غصب واتجنست ايران

نصي هدايا ابثمن والباقي بالمزاد

واهوايه بعد هم بيه

شحسب شعد ماظل عظم بيه

******

ينجح عمل طوعي والخدمه للنسوان

يطلعلك حزب من خندقك وافكارك

ايشچ خشمة يريد ايقود يتكشخ

او لازم.. بالغصب لو باللين..

ان وافقت كل الادب..والمعسول

وان عارضت يبديلك التسقيط

هجوم اعله الشرف.. والشرف بالفخذين

لو نفع..كون انت هم ممنون

لو فشل..شماعة البعثيه؟؟ بعثيه يالغمان؟

لاچن اهلك گضوْ لا جاعوْ اهوايه سنين

لا هججـّوْ ابطرگ العمروالثوب

كرهنه كل جميل اندسنه بالرجلين

منـّاكـَه.. لعبولعب بالدين

بزعت الناس اتْـلَحِـدَت

لايا حراميه واچماله عفطيه

اتـًْعـَـصبي بعد يا (خاله) يا لوگيـّـه

هاي احنه العراقيين منكوبين

منيوبين محسودين جوعانين

نمشي عالذهب وانعيش ملتاعين

لابو النفط لابو السياسيين

شنكتب عالارامل ع الايتام

ع الكتلو رجلها واظلت اتحومي

بلكت چم فلس من خزنة الوالي

ايباوعه ابغنج والثمن..خو غالي

اطفال اليتامه اتريد خرجيه

والمسأله بالدين الجديد اليوم محميه

******

اشكي بس الك والشكوه بس لله

شكتب شگول ماتخلص الچويات

مو انت الگلت ناقصات (العقل والدين)؟

مو آنه!همه اليگولون وابسمك يجيرون

چا شنهي يربي متكلي شنسوي

نكتب حلو يبدي اللغط والندس

مو كاتبه :- رجال يكتب هاذ

والنشر بس هيه

ارد اكتب للخلقنه

اوهوه رب الكون

معقوله التفرقة وهوه

العظيم العادل الرحمن الرحيم

نحسبهه اوالى (التسعه والتسعين)

تخلق مدمغه ياهو اليجي يكفخهه

او بانيابهه يمرعدهه

اههل الشوارب واللحي

يوميه وابقانون!

نوبه امكمخه والحال يبچي الحال

دولمايه تگول والكهربه مطفية..

لوحلوه.. تكون..اوخشت ابراسه**

صيده يكول يرهول او يتلمظ

ماينردع لا يستحي .. ليخاف..

يشبعها غزل او نظرات وحشيه

لوانعال لولزگه.. اوثگل ع الريه

تسكت تبتلي

تحچي تنفضح

والف تالاف اللسن

واتصير مرويه مكتوبه محچيه

نوبه ..عوره :-

زوجوهه تسع اسنين

ييعوها ابثمن

همهه يروح..اتصير حوريه

واهناك يربي..تغتصَب كل يوم

چا شنهي الجره خالقلك اضحيه؟

لو للزلم فصليـّه

واَبحاله شرعيه

بعد اسألك او هم اسأل:-

صدگ بالجنه كاتب عدال واتوكل

احزاب او ساده اوعبيد اومحاميه

وانت القاضي الجبار المتكبر..

هذوله يحمونك؟

فساد اورعاع الگوم اليعينونك

حراميه يربي

بسمك يكتلون

يزنون او يظلمون

واعراض ينتهكون

وحتى يبيدون

لو اصبع شلت؛

تشلعهم شلع..واليحچون

اتوجه الك وانت خالقنه

وانت العدل والسلام وانت جمال وأمان

(احبيباتك) تذلنه ليش؟ الباب السمه واتسدهه؟

شوف الظلم والينه

خلصنه العمر بالروحه والجيه

افرجهه يربي اولا تضيجهه

والمشكله.. ارجوك واتحلهه

—--------------------

آب اللهاب 2023