الخباثة اشكال !! خباثة بمحبة حقيقية !!!!

سيف الدين الألوسي

الخباثة اشكال !! خباثة بمحبة حقيقية !!!!

في ايام الكلية منتصف السبعينيات كنا عايشين بسعادة وراحة بال حقيقية !!

مشاكل معظم الطلاب والطالبات مثل مشاكل عبد الحليم حافظ وفريد الاطرش ومريم فخر الدين وهند رستم !!!
فلان تعارك ويه الحب وتركته !!! علان انتحر لهجر حبيبته له وطبعا جذب وكلاو!!! فلانة شربت نص بطل خروع دتنتحر !! وفلانة رادت تجيت من السطح وجيتت من الطرمة مال الحديقة فداءا للحب الذي هجرها !!!
اني والحمد لله چنت ملتهي بالخباثة !!!
كان في مجموعتنا الكبيرة من اخوة واصدقاء العمر اخ يشتغل بجريدة الجمهورية بارت تايم ،، فاتفقت معه على كتابة كليشة ونشرها بالجريدة !!
الكليشة هي خبر زواج احد اخوتي المقربين مني جدا جدا وصديقي منذ الطفولة وهي تم زفاف السيد فلان ابن فلان على الانسة المصون فلانة وذلك في النادي الفلاني وبالرفاه والبنين !!!
وطلعت الجريدة ثاني يوم والخبر منشور بمكان بارز ، والاخ ميدري باننا زوجناه وخلصنه منه !!!
اشترينا ولمينه خمسين نسخة من الجريدة ووزعناها على الاصدقاء والصديقات ،، انا لعلاقتي القوية جدا جدا بالعريس واعرف والده رحمه الله جيدا واعرف ان والده كان يشتري الجمهورية يوميا !!! فتوقعت ان يقرأها للجريدة وخبر زفاف ولده عريس الغفلة !!!!
العريس اخذ يتلقى التهاني من كل واحد ووحدة يراها بالكلية !!!!
هاي شنو فلان ؟؟ اشو معزمتنه !!! وهو يجاوب والله جذب !!! ماكو هيجي شي !!!
البنات كل دقيقة جايه وحدة !! ايا دنغوز ،، سويتها !! واكو بنية وردة مال الله وتتشاقه متدير بال ، اتفقت وياها على كليشة من تشوف العريس !!! واول مشافته كالتله ،، خاين غشاش ضحكت عليا اني البنية اللي حبتك من كل گلبها وبعدين هيجي تدگ دگه بيه !!! ابو المكسرات !!!.

وهو خطية يفر براسه ويگلها والله جذب ، هذا ال ::::: سيفي هو كتبها !!
والمصيبة الكبرى اول من رجع للبيت ابو تلاكاه من الباب وچان رحمه الله صاير بارود على هذه الدگه والى ان قنعه بانها جذب وسيفي سواها ، هذه المرة اني ترزلت من ابوه الله يرحمه !!!
طبعا اني مذكرت اي اسم صريح خوفا من النسوان رؤوساء عرفاء الوحدات !!!!!!
ايام كان حلوة والاهم من كل شئ نوعية البشر ببغداد اعتقد كانت الافضل بالعالم وليس فقط بالعراق !!!
الف تحية وسلام للزملاء والزميلات الشباب والشابات سابقا ، الجدود والبيبيات حاليا !!!
واشتري الحب بالعذاب فمن يبيع فمن يبيع !!!!!!

  

إذاعة وتلفزيون‏



الأبراج وتفسير الأحلام

المتواجدون حاليا

1126 زائر، ولايوجد أعضاء داخل الموقع