من يومياتنا ... العوز مو بطر

التفاصيل

تم إنشاءه بتاريخ الجمعة, 03 حزيران/يونيو 2022 20:32

كتب بواسطة: أحمد الكناني

                                احمد الكناني

من يومياتنا... العوز مو بطر

المشتري گال حجيه بيش ذني الخشاني؟

گالتله ب ٥٠٠٠

گال شدعوه !

گالتله اخذهن ب ٤٠٠٠ دينار

گال لا هواي ما يسون
گالتله تعال اخذهن ب ٣٥٠٠دينار يمه طكتني الشمس واريد اروحن
گال شنو السالفه ايحلبن خو مايحلبن حتى مايصيرن غده أشويونه (قليلات)
گالتله وحگ ابو فاضل العباس غابشه من فجر الله وماخذتهن ب٢٥٠٠ دينار شتنطيني فوگهن نعمة من الله ؟؟؟
گال كشلي ما انطيچ هن يسوالهن ٢٠٠٠ دينار راح انطيچ بيهن ٢٥٠٠ دينار ... گالتله چا شلون بفلوسهن ؟؟ ولا تنطيني خمسميه فوگهن ؟؟

گال لا انتي مآخذتهن غاليات ، گالتله اخذهن٢٥٠٠ والف عافيه

اخذهن البطل المغوار ب ٢٥٠٠ ورجع رافع راية النصر ودخل للبيت ،،، وتلگته ام الاولاد شوفها الخشاني (سمك الخشني )

گلها حبيبتي ذني ب ٢٥٠٠ گالتله عود صدگ !! گالها والله صدگ ، گالتله ابلاش خوش خشا نيات مالات شوي ... گلها شعبالچ زوجچ نادر وماينغلب چا ياهو اليجي وگال انه مسوگچي!!!
هنا لازم نتدخل ونگول للمسوگجي ...
هاي المرأة من طلعت الساعة ب ٥ الفجر ماطلعت من بطر ولا طلعت تلم فلوس

هاي من طلعت الساعة بالخمسة الفجر لاسعها العوز والظيم وتريد تحصللها خمس الاف دينار لان اكو من ينتظرها تجيبله وياها طماطات بتيتات

لاتنسى اطفالها هم ينتظرونها بلكي تجيبلهم نستله چبسات فاكهة وتفرح اولادها

هيه هم مثلك مو اقل منك وطالعة على باب الله من عوز مو من بطر
ولولا الحاجة ماكعدت تحت حرارة الشمس اللاهبة .لاتتشاطرون وي الناس الفقرة وتتداهرون على خمسمية دينار .