زغيرة،،،

التفاصيل

تم إنشاءه بتاريخ السبت, 12 شباط/فبراير 2022 18:58

كتب بواسطة: تغريد عبد الرزاق نوري

تغريد عبد الرزاق نوري

زغيرة،،،

زغيره وما عرفت الحب
ولاضگت العشك الا على ايدك
ورهنت الروح والدلال
كلها بيدك
شيخلص الليل
من طيفك يجي ويروح
وتضل عيني
تشوبح ليك وتريدك
اريدك يمي من اشتاگ
وتحس بكلبي المشتاگ
وتصير لعيوني كحل
واغمض عيوني كلش حيل
واخاف عليك لا تنباگ
وتصيرلشفافي قلم حمرة
واضوكك يا طعم تمره
يالطعمك كلش حلو
من تنضاگ
تريد انساك
شلون انساك
ودكة الگلب ما ترهم تره بلياك
والا وياك

انطر جيتك آنه بتوالي الليل
بلكي تمرني بحلم
مشتاگه احضنك حيل
وبلكي تمر بيه حمد
واقبل اصير الريل
ما باقي عمر ننتظر
مونهدم حتى
الحيل
ولاضل وكت انتظر
وسنين الفرح ما مرن عليه
وركضن ركاض المنجرف
ويه السيل
اتاني كلي لشوكت
يل ضوكتني الويل
كهوة بهاون انسحن
وحبك بيَّه ريحة هيل
ومن هجرك صبرت هواي
وطفح حتى الصبر منه الچيل
تحت جدامي تاه الدرب
وبالحيرة جازاني الوكت
امشي بلياك مثل العمي
بظلمة وربها الدليل

الگاردينيا: الشاعرة المتألقة / تغريد عبدالرزاق نوري