ميلادي اويه المسيح

التفاصيل

تم إنشاءه بتاريخ الخميس, 13 كانون2/يناير 2022 16:44

كتب بواسطة: ميسون نعيم الرومي

ميسون نعيم الرومي

ميلادي اويه المسيح

ميلادي اويه المسيح الناس محتفله
مشــتهـيه (العـراق) البيت والنخله
يابيـت الأهل يالطشــت اصحابـه
غصبـوه الغـرب نهـبـِـتـَه النهابـَه
***
*غصبوهه الأرض واسنين باگوهه
ضحكات الأهـل يا عـيني خنگوهه
يا دار الأهـل يالتطلب (العـونـَـه)-
اقـتحموهه غـصب سراق ملعونه
***
چا ويـن العـدل يا ناس والقانـون ؟
يمته الخلاص اويمته ربي اشلون ؟
يا دار الأهـل يا (يمَّـه) يا (يابـَه)-
يا ظلم (القـدر) ما ندري اسبابه
***
سـحگوه الورد والثـيـله داسوهه
صلبـوه النخل والنبگه گصوهه
يا دار الأهل يا حـَـقـْـنه يالمسلوب
عقدين انگضن ! چا يمته يا مهيوب ؟
***
رحنه (للوطن) وانريد نرجع غاد
لا دار البقت .. لا عدنه ناس اشداد
المن نشـتـكي شو نايم القانـون !!
ما عدنه حزب .. يا وطن گلي اشلون؟
يا وطن گلي اشلون؟؟
----------------------
*اقصد بيتنا الذي اغتصب من سنة 2004 لحد الآن
----------------------
كانون الثاني/2022
سـتوكهولم