يا شعب يامنكوب

ميسون نعيم الرومي

يا شعب يامنكوب

ذلـَّـتنا اللجان..
اشبعنه من اللوعود..
واعلان الحداد .. اللطم ع اللخدود
والمايستحي ميخاف .. اويتعدَّه كل اللحدود
ذلـَّـتنا اللجان اوصرنه بس انوح
اتفرهد بالشعب والعدد مثل الدود
كبش الفداء اتدور انت اعليه؟
البدوه امن الوزير.. او قادة الأحزاب
اتصدگ چذبتك فرحان يا مگرود
تضحك ع الشعب ؟
توعد وتمضي اسنين..
مكشوف اصبحت..
تاجر كلام اوأبد ما محمود
يا مگرود
صرنه ننشوي بافران ياظلام!
واسنين الحكمتوا سنين كلهن سود
يا منكود
لوتنسحب .. لوبسك اسكت عاد
مكشوف الچذب يا صنف يا نمرود
ملينه الچذب هالإسلوب !!
***
متنشط الحرگ بالصحه هالأيام
وابنفس الفلم كل يوم هالإسلوب
يا شعب يا متعوب
على احساب الشعب تتصارع الأحزاب
يا شعب العراق الشاف بس احروب
تغسل بالدمه واللحم هالمحروگ
جوع اومرض موت اوقهر يا منهوب
يا شعب يا منيوب
* (ابن الخطيب) الجرح بعده اينز
*(مستشفى الحسين) اليوم هم النوب
***
على البوگ اونهب.. تتصارع الأحزاب
وابدم الشعب تتوضه كلهه اذنوب
يا شعب يامنكوب
ولدك تنكتل والجوع يعصف بيك
كبرت بلوتك يا شعب يا مرعوب
كلهه اتفحمت مرضانه وين انروح!!
والعالم سكت يستنكر اوبالدوب
يا شعب يا مرعوب
***
اسعفني ياگلب ياعين صبي ادموع
على بلوة وطن والشعب هالمنكوب
أدمنه الحزن والنوح والآهات
نغسل بالدمه والعمر كله انلوب
يا شعب يا منهوب
انعيـّـش بالدول نشگف اعله الجارات
جوعان الشعب .. بالگلب هالمصيوب
اعصف ياغضب واتعنه للخضراء
اكنس بالزبل وانقذنه يامهيوب
يا شعب يا منكوب
انقذنه يامهيوب
-------------------------
* في 24 أبريل/نيسان 2021، اندلع حريق في المشفى
الذي يُعالج فيه مرضى فيروس كورونا
نتيجة انفجار أحد اسطوانات الأكسجين في الطابق المخصص للإنعاش الرئوي
في المشفى مما أدى لوفاة 82 شخصًا وإصابة 110 آخرين.
عن (ويكيبيديا، الموسوعة الحرة)
---------------------------
*مستشفى الحسين:- لقي 92 شخصا على الأقل حتفهم وأصيب العشرات
بعد اندلاع حريق في جناح عزل فيروس كورونا
في مستشفى الحسين بمدينة الناصرية العراقية يوم 12/7/2021
----------------------------
14 / تموز / 2021
ســتوكهولم

الأبراج وتفسير الأحلام

المتواجدون حاليا

444 زائر، ولايوجد أعضاء داخل الموقع