كلما يهل الگمر

التفاصيل

تم إنشاءه بتاريخ الخميس, 04 حزيران/يونيو 2020 06:24

كتب بواسطة: ميسون نعيم الرومي

ميسون نعيم الرومي

كلما يهل الگمر

كلما يهل الگمر
اتمعنن ابنوره او احن
نجمات چن زفة عرس
والليل كحله للرمش
السمه شذرات اوضوت
عالرگبه گردانه
النخل يتمايل غنج
غنوة فرح بسمانه
والنسمه وي طرت الفجر
غنت فرح نهرانه
يادجله يالمايك عذب
حلم اوأمل عنوانه
***
الموج عالي يابحر
والروج يتهاده اويرد
نوبه ابفرح نوبه ابغضب
الريح تلعب لعب
ما تنحزرلا تنعرف
مركبنه ضاعت وجهته
قبطانه تاهت عرفته
متعوب يا ليل السفر
والعمر راح اتعده
الصبر گاعه مولحت
ماضن يخضر ورده
أحاه يا ديرة هلي
خيرچ الغيرچ عده
***
حرگوا الحنطه والشلب
فلاح دمعه ابچفه
عامل يحومي ع البعد
تحفر العبره ابخده
چم دوب نبچي اوننتحب
والحسره تچوي بالگلب
يا لليل عـَـشعـَـش بالبلد
ناشر عباته اوحزنه
واشعلنه شمعه للشمس
يوم او تمر تذكرنه
اتعبنه يادنيه بعد
من محنه نغزل محنه
***
الوطن باگوه الوطن
لتگول يمته اوتحن
اسكت اومامش رجه
مات الحلم بسك تون
كافي يروحي بعد
طالت اسنين البعد
والعين تربي اوترد
تترجه يوم امن الصبخ..
يزهر او ينبت ورده
سيس بلمنه ابلا هدف
والدهر يلعب بينه
لاچنه رحنه اوجينه
لاچنه رحنه اوجينه
------------
2 / حزيران / 2020
ســـتوكهولم