غـَـربـل يالكاظمي

التفاصيل

تم إنشاءه بتاريخ الجمعة, 15 أيار 2020 06:25

كتب بواسطة: ميسون نعيم الرومي

ميسون نعيم الرومي

غـَـربـل يالكاظمي

غربل يالكاظمي غربل اوراويـنه
همتك من صدگ لو تچذب اعلينه؟
غـربـل يالكاظمي وابـدي بالكبار
تعبنه الحچي واحزاب هاي العار
غـَـربـل يالكاظمي يالچـنـت منهم
تعرف كل زغير اچبير من عدهم
***
دستور عدنه..اوهم عدنه قانون
لنريد المكرمه اومن انريد الفنون
اشبعنه (هوبزه) واشبعنه إعلام
وابدم الشباب اليوم متحنيه حكام
البدوه (بالقضاء) او ينصلح زيـن
هجموه الوطن هالصار(عقدين)-
***
والبرلمان المتهم بالزور والبهتان
ينحـَـل ابعجل واتـفـَـرّح الشــبان
تحيي بالأرض واتـشـَجـّع الفلاح
لا تنسه الصناعه وايصير اصلاح
اتباوع للشعب شعـب الحضارات
يمشي عَ النـفـط وايعيش ويـلات
***
شوف العراق اليوم هالصار منخور
مهمل منتهي يشتكي امن الجور
هجموهـَه هـَجـِـم منكوبـَه (بـغـداد)-
ذل اومهانه اومرض والعيشه بالكاد
غربل يالكاظمي والشعب سور ايصير
يحميك الشعـب .. والرايـد التغيير
غربل يالكاظمي غربل اوراوينه
همتك من صدگ لو تضحك اعلينه؟؟
-------------------
مهداة الى رئيس الوزراء مصطفى الكاظمي
14/مايس/2020
ســـــــــــــــــتوكهولم