ابيات من الدارمي


ميسون نعيم الرومي

ابيات من الدارمي


هدوا على التحرير كتلوا ولدنه
يا شعب تسكت ليش والبلوه جتنه
***
ميـّه جرح بالروح .. يوميه بلوه
بس العراقي ليش .. دمعاته سلوه
***
گلبي خلص ونات .. ونه اعله ونـَّه
يمته الفرج نرتاح .. محنه اويه محنه
***
شـَـمْعـَوا الخـيط اليوم ..گاموا يشــردون
گـَشـَّـوا افلوس الناس..والوطن مديـون
***
-(أوغاد) الطغوا يا ناس .. حكموا وطنه
سـِـقط المتاع اشـلون .. ياشعب مـِحنـَه
***
عيشة رعب واحروب .. شفة العجايب
وانوبه هالسراق .. عـِملوا مصايـب
***
ضيم اوحرب ،امراض هالكثر همهم
ما شفنه راحه ابيوم .. جرعونه سمهم
***
لاغمضْ جفن العين .. لا هادت الروح
من الزغر لليوم بس .. نبچي وانـوح
***
يادنيه بسچ عاد .. ضاگت علينه
شوية نفاهه ارجاچ .. بلوه ابتلينه؟
***
مية جرح بالروح هالتصرخ اتصيح
واكليبي صار ارماد .. وابعاصف الريح
***
ضيم اوحزن واهموم .. چا بس علينه؟
مدري الزمن غدار ! مدري امن ادينه
***
متوجره نارچ ليش .. واحنه حطبهه
يادنيه كافي اوبس .. شنهي سـببهه
***
عزله اوتـَـرَقـْب، خوف .. روحي حزينه
-(كورونه) عَ الأبـواب .. تـتسـَـله بـيـنـَه
----------------
21 / نيسان / 2020
سـتوكهولم

الأبراج وتفسير الأحلام

المتواجدون حاليا

441 زائر، ولايوجد أعضاء داخل الموقع