ام الشهيد اتصيح عينونه

التفاصيل

تم إنشاءه بتاريخ الجمعة, 11 تشرين1/أكتوير 2019 05:26

كتب بواسطة: ميسون نعيم الرومي

ميسون نعيم الرومي

ام الشهيد اتصيح عينونه

عريس وابدمه يحـَنـْونـَه – لفـّوا بالعلم وامسلهم اعيونه
غاد الچفن ليغاد فدوه الگذلته – يجناز انتظر خل ربعه يزفونه
لا چنه كبر وافرحتي بسنينه – طفو شمعته وانخطف يا لونه
ام الشهيد اتصيح عينونه
عريس وابدمه يحـَنـْونـَه
***
لفـّوا بالعلم واحلامه خِنگوهه – امحسر يا عـُمـُر واسنينه عـدْموهه
مدرسته بچت والكتب لموهه – اصحابه اوهله .. ابتابوته حطوهه
يجناز انتظر ضحكاته جمعوهَه – احلامه،والدمع،ع الگبر طشوهه
طفو شمعته وانخطف يا لونه
ام الشهيد اتصيح عينونه
***
لا شغل عدنه اولا عمل – بعده المخطط ما كمل
امعمم اوقاط او(فخفخه) – كلهم حثاله ابلا أصل
ذبحوا ولدنه يا شعب – جرح الوطن ما يندمل
بشوية چذب خدعونه
ام الشهيد اتصيح عينونه
***
-(مهدي اوصالح والربع) – امروا ابقتلك يا شعب
أملاك وافلوس املتله – وانت الك جوع اورعب
تگدر حرامي اتأمنه؟ - لو صدگت مـَـيضل عـَـتب
وعدوا بالوعد باچراوينسونه
باعوه العراق اشلون يحمونه
ام الشهيد اتصيح عينونه
جمع او فرد فدوه اله اولعيونه
عريس وابدمه يحـَنـْونـَه
----------------
11/ اكتوبر/2019
ســــتوكهولم