البصره تـِـنتحب

التفاصيل

تم إنشاءه بتاريخ الأربعاء, 29 آب/أغسطس 2018 06:21

كتب بواسطة: ميسون نعيم الرومي

ميسون نعيم الرومي

البصره تـِـنتحب

البصره تـِـنتحب ياروحي هِـلـّي ادموع

مايــچ هالتـِــسمّــم والشعـَـب موجـوع

سـَـــم حطـّــوْ إلـِـــچ والنفط هالباعـوه

مامش كهـربه شعلوْ اضلوعي اشموع

حِـــيــتان : الكـــروش اتهدلت للگاع

و (البصري) يغـَـمـّـس خبزته بالجوع

أطفالـِـچ يـَ (فـَـيحـَـه) المرض سـابيهم

(سـَـيـّـابچ)* گعد وابشِـعـْرَه هالمسموع

ياروحي هـِـلـّـي ادموع

***

الدنيـَـه فلك .. ناعـًـور دومَـــه ايـدور

قريـب اليوم واحدكم اوبي مـَـصروع

شط العـَـرب عَـطشان اوشحيح الماي

(الإيران اوتركيه) .. اومايه هم مبيوع

عـَـمالـَـتكـُـم انفضحت شرذمه اولملوم

غرگِـتـُـو بالذهـَـب والفقره تبچي اتلوع

هالـْـثار الشعـَـب ... گـُـربت نهايـَـتكم

مـَـتــْـفـــيد الحمايـًـه اولا تفيد ادروع

ياروحي هـِـلـّـي ادموع

--------------------
* سـيـّـابـچ : شاعرنا العراقي البصري بدر شاكر السياب (رحمه الله) ـ

------------------

26/آب/2018

ســــــــــــــتوكهولم