الگاردينيا - مجلة ثقافية عامة

ما اگدر

التفاصيل: تم إنشاءه بتاريخ السبت, 04 آذار/مارس 2017 08:10; كتب بواسطة: سوسن سيف

سوسن سيف

ما اگدر
من اشتاگ
ياهو الوصلني
ما اگدرْ
أوديلك
سبع بوسات
وهم اكثرْ
تسأل ..
أدري .. ما تسألْ
غرگان بزمن أغبرْ
غرگان بدنيا تعبانة
بعمر خسران
وتبخرْ
انتظرك
بدرب أظلم
بليل طويل
يجر آهات
واتحسرْ
ما أگدر
حتى الحچي وياك
راح وتبعثرْ
ما يوصل
ولا حتى الصوت
حتى الحسرة
والدمعة
أشلون أسلاك
وگلي بعد شأذَكرْ؟
ظلت ريحتك يمي
بس الطيب
والعنبرْ
الدنيا جانت ويانا
ريانة
وكلشي چان بيها
بس عشب أخضرْ
هيجي العمر ينگضي
وهيچي نحرگ سنينه
وهيچي
مثل الجام يتكسرْ
حسافه العمر كله راح
وآنا
ماگدرت اوصل
وهذا الي انكتب
مو بيدنا
وصلنا آخر محطة
وصوت الريل
يبچينا
ومن يوصل أشكثر .. يقهرْ
4 * 3 * 2016
سوسن سيف
باريس