قصة أغرب من الخيال لكنها تنطبق على واقعنا اليوم

التفاصيل

تم إنشاءه بتاريخ الأحد, 20 كانون1/ديسمبر 2015 19:45

كتب بواسطة: عراقي

                       عراقي

قصة أغرب من الخيال لكنها تنطبق على واقعنا اليوم أقرأوها للاخير رجاء  ....

واحد إندكّت باب بيته، طلع جاي واحد لبيتهم خُطّار، گلّه حجي انت ما تعرفني ، بس آني راح أعرفك بنفسي، اولا راح أسألك ، انته انباگت عندك سيارة بالثمانينيات، گاله اي بويه صدگ، گالّه: حجي آني اللي بُگت السيارة مالتك والدليل انته چنت إمخلي هوية الأحوال المدنية بالسيارة، وهاي الهوية جبتها وياية، هي قديمة وما تمشي هسة، بس حتى اعترفلك، حجي آني مذنب أمامك بس صدّگني بوكتها ما عندي عشه لجهالي و لَچعنّي الضيم فد نوب، بس حجّي شأسولفلك بعد ما بعت سيارتك الله فتحها بوجهي و گامت الفلوس تفور عندي، وهسة اتذكرتك وجيتك دخيل تقبل توبتي وبنفس الوكت اريد اعوضّك عن السيارة، الحجي گالة: بوية السالفة قديمة وراحت بوكتها، العوَض على الله، گاله حجي أبدْ بالحرام ماروح منك الا اشتريلك سيارة حتى يرتاح ضميري، گاله بوية ما لازم عفيت عنك، گاله لا تسولفها حجي، روح جيب مستمسكاتك وامشي وياي للمعارض، اللي عندي كلّه من خيرك حجي، المهم الحجي اقتنع وأخذ المستمسكات ويّاه وراحوا للمعارض، گاله حجي اختار إنت اللي تعجبك، الحجي ابمستحه أشّر على سيارة عادية من ذني اللي سعرها ما يعبر الـ٤٠ ورقة ، گاله لا حجي !! شنو هاي، تعال ابو المعرض هاي اللاندكروز الجكسارة بيش، ابو المعرض گله سبع دفاتر، گاله اي هاي السيارة نشتريها اكتبها باسم الحجي، ابو المعرض گال للحجي اتفضل بالمكتب حجي، وجيب جنسيتك خل نتكاتب، الحجي دخل للمكتب، ابو القاط گال لأبو المعرض خوية شنو تريدنا نشتري سمچ بالماي، گاله ليش خوية؟ گاله غير نطلع بيها تراي، نفحص السيارة، گاله اي عمي حقك، هاك السويچ على ما اتكاتب وية الحجي..
 صاحبنا شغل السيارة وطلع من المعرض والحجّي گاعد بالمكتب، !!! هسه يرجع،،، هسه يرجع ،، ماكو مرّت ساعة وماكو شيء... ابو المعرض گال للحجي: حجي وين صاحبك، الحجي گاله عمي هذا مو صاحبي، هذا سالفته كذا وكذا وسولف الحچيته الكم، ابو المعرض گله خلي يوّلّن، تره بزعانين من هل السوالف حجّي آني حقي يمّك وهاي جنسيتك والمكاتبة باسمك، وجيب مشّاية وودي مشايّة تاليها الحجي باع بيته وسدد ابو المعرض، يعني الحجي انباگ بوكتين .(انتهت القصة)
طبعا يگولون ابليس ضال صافن ويصوفر، وبايس الحجي ومطلعله خمس وعشرين الف گاله بداعة جهّالي بس هَذني عندي هسه بگتهن من إمجدّي وتره هذا ابو قاط لا اعرفه ولا يعرفني، لانه لا آني ولا كل ربعي الشياطين نكدر إندبر هيچ سالفة!!
حبايبي...
انتوا أكيد اتأثرتوا بالقصة لان گلوبكم طيبة مثل گلب الحجي، بس آني الفطير، صار
 شهرين السالفة إبّالي واليوم يلله طخّت عندي، وشفت اللي صاير بينا اكثر من اللي
صار بالحجي، راح تگلولي إشلون؟

اني اگللكم شلون، اللي باگونا بالانتخابات الاولى شلون رِجَعْنا وانتخبناهم؟ همة مو باگونا اول مرة، ورجعوا نفسهم بالانتخابات الثانية وبنفس الطريقة گالوا راح نعوضكم على اللي فات وراح نسوّيلكم الشط مُرگ والزور خواشيگ، و تالي مو بس بَيَّعونا البيت  لا ، بَيْعّونا وطن كامل ، ،،،

 هاي السالفة كلها ما غاثتنّي، تدرون شنو اللي غاثني؟؟
 كل اللي يسمع السالفة يتعاطف ويّة الحجي ومحّد أتعاطف وية الحرامي
 بسْ إبسالفتنا لحد الان اكو ناس تجيب صور هذوله الحرامية اللي باگونا وتلزگها بالفيس وتكتب جواها انت قائدي ومولاي!!!