على باب الصبر كل يوم أتانيك .. شعر شعبي رائع

التفاصيل

تم إنشاءه بتاريخ الجمعة, 20 تشرين2/نوفمبر 2015 22:03

كتب بواسطة: عراقية

على باب الصبر كل يوم أتانيك

على باب الصبر كل يوم أتانيه
واتاني الدمعة تصرخ خاطر ابجيهه

لان گلبي بغيابه مثل ريشة طير
وبس ريح الشماتة اليتهز بيهه

امس بالليل روحي عطشت لملگاه
لان طولة نهر مو غيره يرويهه

وگمت ابچي وانوحن لو يمر طاريه
واريد عيوني يمه لو يخليهه

وبكثر دمعات عيني اليوم انة مشتاگ
واتمنى سنيني يمه تكون تاليهه

صارت عيني ظلمة وماشوف النور
لان طيفك حبيبي الي يضويهه

انة روحي وردة وذبلاهه الشوك
يمتة تحن دگلي ومرة تزكيهه

صدگني من احن واذكر ايامي وياك
احس گلبي حضارة يريد يفنيهه

انة ردتك تجيني بوحشة الايام
گبل ماحالي قصة يريد ينهيهه

وانة ردتك دوة لو طحت بالاهات
واذا كبرت روحي انت تشفيهه

صدگني بغيابك گمت اخط اشعار
وافزبالليل وحدي وگمت اغنيهه

شنهي من گلب عندك مايحن فد يوم
ولا يذكر سوالف چنة نحچيهه

انة گلبي سفينة وغرگت من سنين
مايلحگ بعد لو نوح ينجيهه

انة بعدك بچيت وهدمتهه الروح
بس اصبر واكابر وراجع ابنيهه

انة رايد اگلك ولو بعد كلمات
لچن كلما اشوفك خايف احچيهه

صدگني من اشوفك كلشي بية يطيب
لان دمعات عيني ضماد اسويهه

ولو خليت بية جرح كل لحظة ملجوم
واذا ماتن جروحي انت تحييهه

شفت طول المسافة ماتحدهه حدود
رغم تعبن جدامي بس لازم امشيهه

لكن گاعي ماتت والليالي طوال
واظن سيف الصبر بس هو يحنيهه

شفت بالضيم حالي والعتب عالعين
ودعيت العين كون الضيم يعميهه

اثر ذيچ الليالي ماظنه يروح
اذا راح الاثر مااظنه يمحيهه