لاتسولف ...

التفاصيل

تم إنشاءه بتاريخ الإثنين, 25 أيار 2015 10:53

كتب بواسطة: نضال الحار

نضال الحار

لاتسولف حجينا هواي
كافي من السوالف
مابقى الينگال كلشي گلنا
خل حچيك خاتل بسد الشفايف
لاتسولفلي على روحك
ولاتگلي شبيك أدري خايف
وأدري ثلثين العمر حدّر هموم
وبروجة الأحزان طايف
لاتسولف
چنت أضن الدنيا ..الدنيا
گمره تصير ويهل الربيع
وجنت أضن الماي ..الماي
خنياب على جرفك
شما جزر نهرك
مايبيع أهله عطش لامايبيع
لاتسولف

وچانت الأيام مراجيح بزغرنا
وچنا نشتم المحنه البيك
هيل صافي بشيلة أمنا
وچنا نتسامر عشك والحب يلمنا
وچنت أشوف الظلمه بعيونك صبح
وچان من يجرحنا شوگك
مانصيح نعض عل الجرح
وهسه كل شوكك جرح
وهسه كل دنيانه غصه وياك
وفرحه أبدن ماتصح
لاتسولف

جربينا نسهر ليلنا نواطير
لطاري النخل
صبّح الطاري ملح
وجربينا نصالح الخربان
من مايل وكتنا
معاند ومايقبل صلح
وجربينا نموت غفله هَيج غفله
على مودك كلنا بلكي تصير
ويانه سمح
وجربينا نكتب بعشكك قصايد
وكُلش بحبك نلح
آه يابيدر خضار
وخيره عل الوادم يشح
لاتسولف
وصارت الدنيا دمع وياك
والضحكه جرح
وحتى ورد الكاع غيّر لونه
وبطّل يفح
لاتسولف

أدري صندوك الفرح مغلوك
ولوتمطر الدنيا نجوم خضره أعليك
ماينفتح