أنطش الماي

التفاصيل

تم إنشاءه بتاريخ الأربعاء, 06 أيار 2015 16:14

كتب بواسطة: مثنى عبيدة

مثنى عبيدة

أنطش الماي ويا هو اللي يجمعه

انشك الثوب يا هو يركعه
 
بح الصوت ومحد يسمعه
 
هذا العراق گلبه شكثر وسعه
 
 
الله ما أجمله وما أحلى صنعه
 
بس أيه يأخوتي ..  يا هو اللي يرجعه
 
أنطش الماي ويا هو اللي يجمعه
 
 
العراقي الحر شمحلى طبعه
 
ما يحتاج واحد يفزعه
 
الخير من أمه يرضعه
 
مثل النخل مثمر وعالي جذعه
 
العراقي شريف لأبنه يخدمه ويشبعه
 
للأم الكريمة يخفض جناحه  ويوسعه
 
يركض ركض للأصدقاء وربعه
 
يبچي لأجل الغريب وتنزل الدمعه
 
واحد واثنين ولده و حتى لسبعه
 
يفديهم ويحمد الله ويركع الركعه
 
أنطش الماي ويا هو يجمعه
 
بس ليش يا هو اليچي يخدعه
 
ليش  الظالم دوما يقمعه
 
يريد من الجذر يقلعه
 
 
والله يا أنذال ما تستاهلون غير ألصفعه
 
يا حثالة وصبغ الحذاء يلمعه
 
فرقتونا وطشرتونا وصرنا بإخر بقعه
 
صار الدنيئ .. للعراقي يردعه
 
صار الجوع للطفل يصرعه
 
صار القتل بالمجان يوزعه
 
قانونه قانون الغاب يشرعه
 
شربتون السم اللي محد يجرعه  
 
خليتوا حتى الصبور يجزعه
 
صار الغريب يحكم بالعراق و يلسعه
 
 
حچينه و گلنالكم خلولكم خط رجعة
 
بس .. أنطش الماي ويا هو يجمعه
 
هسه جاي تسال خوه .. يا هو التقنعه ؟؟
 
اليتيم لو المقتول گدام أمه تصرعه
 
لو النازح تتشمت بيه وتدفعه
 
بعد ما فرقتو دجلة والفرات وفرعه
 
بعد ما أنطش الماي ويا هو يجمعه
 
كولي يا هو التقنعه ؟؟ يا هو التقنعه ؟؟؟
 
الله ينتقم من الظالم وما يجمعه
 
سحت وحرام وزقوم يوجعه
 
ما يفيده دواء ولا ينفعه
 
تضيق عليه الأرض وما توسعه
 
بعد طشيتوا  الماي ويا هو يجمعه
 
وأنشك ثوب العراق وصار ألف ركعه
 
الله لا يوفقكم ولا يقبل لكم شفعه
 
طشيتوا ماي العراق گولولي يا هو اليجمعه ؟؟؟
 
بح الصوت يا هو اللي يسمعه
 
أطشر العراق يا هو اللي يجمعه
 
أطشر العراق يا أهل الرحم منه الليجمعه

إلى أهلي النازحين .. أعذروني لا أملك إلا الكلمة
إلى الظالمين .. سأحاربكم بهذه الكلمة
6 / 5 / 2015 م
مثنى عبيدة حسين