من الموصل للانبار

التفاصيل

تم إنشاءه بتاريخ الأربعاء, 18 حزيران/يونيو 2014 17:06

كتب بواسطة: مثنى عبيدة

مثنى عبيدة

من الموصل للانبار

 لبغداد سايره للعشار
 
عربات الموت يجرها القطار
 
بيها دماء العراقيين انهار
 
ظلم .. قتل .. ليل ونهار
 
يا عراقي
 
تكول أني من شيعة الكرار
 
بس علي ما يرضى بقتل الأخيار
 
وإذا من سُنة محمد وصحبه الأطهار
 
حبك للآل واجب ولأبو الأحرار
 
أخوتي الله يخليكم ويخلي الصغار
 
ترى بلدنا مو كومة أحجار
 
مضيف كرم للغريب و للخطار
 
حضارة وأهله ثريا وأقمار
 
العراق سيد بين الأقطار
 

عراق
 
ثوبك أتمزق وتكتطعت الأزرار
 
ومنطفيه هسه بيك الأنوار
 
خفافيش الظلمة وغربان الأشرار
 
تفتر چـنها إعصار
 
بس نسوى الأنذال حكم الأقدار
 
العراق دوم ينهض بـاقتدار
 
يا ما غزوه وحوش وتتار
 
انبهروا بيه وتركوا الكفر والكفار
 
صاروا طلاب ينهلون منك الأفكار
 
يشمون ترابك ويقدمولك الاعتذار
 
واللي عاند منهم صار من الاصفار
 

عراق
 
عراق الروافد والأنهار
 
عراق الهور والشلال والآبار
 
يبقى نخيلك عالي والأشجار
 
تهدي للمحبين التمر والأثمار
 
وتكسر رأس الظالم والعيار
 
ويبقى لولد الولد يلحكه العار
 
عراق  عراق
 
تبقى الدنيا تنظرلك بانبهار
 
ترابك طاهر يا أبو الثوار
 
تستأهل نكتبلك كل الأشعار
 
نبحر بيك المحيطات و البحار
 
نصلي وندعو بالأسحار
 
ربنا الرحيم القوي الجبار
 
يخذل كل حاقد وغدار
 
يفضح نواياهم وكل الإسرار
 
ويا رب
 
أحفظ  لنا  العراق  يا قهار
 
أحفظ  لنا  العراق  يا قهار
 
 
بلدي العراق ما نملك إلا الدعاء والكلام الطيب نهديه إليك ونرجو

الله أن يحفظك أيها الغالي
مثنى عبيدة حسين
18 / 6 / 2014 م