عمشة أم البستك عضو بالبرلمان .. صلوا عالنبي !!

التفاصيل

تم إنشاءه بتاريخ الأحد, 28 آب/أغسطس 2016 08:38

كتب بواسطة: جلال چرمگا

عمشة أم البستك عضو بالبرلمان .. صلوا عالنبي !!

      

ما أنريد نظلم أحد ولكن مع هذه وتلك مانريد أن نسكت عندما أنشوف حالات غريبة و شاذة حتى لانصير كالشيطان الأخرس!!.

النائب الفلتة وسليطة اللسان/ حنونة الفتلاوي طلعت على فضائية وأعترفت بكل صراحة بالمناسبة هذه أول مرة وأعتقد أخر مرة تحچي باهالصراحة .. گالت:
كلنا أستلمنا كومشنات وعمولات.
يعني كلهم وكلهن كانوا وسطاء بين طرفين..يعني بصريح العبارة دلالين و دلالات وهذه ماتقبل غلط أطلاقا ، وبالمناسبة هذه ما تقلل من شأن الأخوة الدلالين كونها مهنة شريفة ولكن يصير نائب بالبرلمان ويمثل كذا خلق الله يصير دلال؟؟
ولو بهذا الزمن كلشي أعوج ماشي و محد يتجرأ ويگول ليش؟؟.
لكون هذا( الليش) قد تكلفة حياته أو يفقد وظيفته والأمثلة كلش هواية!!.
وياسادة يا كرام موبس (حنونة الفتلاوي) دلالة بأمتياز وحسب أعترافها..لاء يابة لاء ..أكو بالعشرات دلالات بالأصل ووصلن الى البرلمان وواحدهن وراها درزن حماية وسيارات دفع رباعي وحصانة وجواز دبلوماسي و..الخ ومنهن:
- عمشة أم البستك!!.
هاي منين وهذا شلون لقب؟؟.
هذه الأخت كانت تفرش الأرض وگدامها ميزان صغير بأحدى الأسواق الشعبية تبع (بسكويت) بس بسكويت أمكسر تأخذها من المعمل بربع ألسعر وأقل شوية كودن عندها واسطة.
الواسطة رجلها الزاير اللي كان حارس بمعمل البسكويت.
طول السنوات الخالة عمشة ماگدرت تگول(بسكت) ..لاء كانت تصيح:
بستك يا حلوات.. تعالن بستك مثل الورد..وينچن يا الحليوات خوش بستك يلوگ الهالحگ!!.
زين وهذه شوصلها البرلمان وصارت عضوة ووراها كل هالحماية والسيارات وواحد يفتحلها الباب وواحد يستعدلها وألأخر يفتحلها الطريق وعيونكم ماشافت والخالة عمشة نافخة نفسها چانها عليشيش ماعايزها غير أتصيح: علوو..علووو..علوووووو.
قصتها قصة يا خلك الله وبأختصار:
هذه بزمن العبودية والظلم والكراهية والعنصرية نعني أقصد قبل تحرير العراق ودخول الأخوة ألأمريكان الى بغداد!!.
هذنيچ الأيام كانت أكو مدارس محو الأمية ، وبالمناسبة عمشة كانت تسميها (نحو الأمية) المهم دخلت سنة وسنتين وقطعت خوش مرحلة وهناك عمشة گامت تكتب وتقرأ بس كفيلكم أبو الجوادين ماگدرت تتلفظ البسكت أستمرت أدكول بستك و خوش بستك!!.
ياسبحان الله سواها البخت وعمشة صارت خريجة الأبتدائية وأستلمت شهادة التخرج و چرچبتها وعلگتها بالهول حتى الرايح والجاي يشوفها..لعد شلون مو من حقها بعد هالتعب وكل هالسنوات وماتعلگها؟؟ والله لوموعيب چان علگتها برة اباب الحوش حتى الرايح والجاي يشوفها .
راحت أيام وأجت أيام وعمشة شايلة خشمها وصارت حديث نسوان المحلة كلها.
فد يوم وراء العشاء وهمه يشربون الچاي ، عمشة گالت الزوجها الزاير:
أگلك شني رأيك أرشح للبرلمان؟؟
الزاير چان يشرب چاي، من سمع كلامها إلا شوية ويختنگ لأن الچاي زرگ البلعومة والله ستر!!.
شلون؟؟ شلون؟؟ شگلتي بروح أبوچ؟؟.
- عليش متعجب..شني حسنية أم الهلاهل* أحسن مني لو حورية نخالة**؟.
ولچ هذني عدهن واسطة وشهايد جامعية أحنة منين عدنا واسطتهن؟؟.
لا تفكر أمرتبة كلشي و كلاشي :
اولا: بدلت أسمي من عمشة الى أسم جديد .......!.
ثانيا: رتبت شهادة أعلى من نحو الأمية والأبتدائية ، سوللي شهادة خريجة معهد التكنلوجيا قسم الكهرباء!!.
وحگ العباس تخبلتي.. ولج شجاچ؟؟ يا كهرباء يا صخام ولچ أنتي ماتعرفين تحطين گلوب لو تبدلين بلاك كهرباء ، صار شهر جرس الباب عاطل ليش مابدلتي؟؟ والنوبة خريجة؟؟ ولچ بابة أسكتي لايسمعوج؟؟.
الزاير يحچي وعمشة أذن من طين وألأخرى من عجين مصرة على الدخول للبرلمان لابل متاكدة مية بالمية راح تفوز بأعلى الأصوات.
أجت أيام وراحت أيام وهناك (چروب) وعمشة عضوة بالبرلمان وجابت أكبر عدد من الأصوات!!.
يايابة يوم اعلان النتائج ..حفلة من هذا المعدل..توزيع البقلاوة والزلابيا و كليجة ام التمر بالكيلوات وقواطي الكولا والفانتا والعصائر بالمئات .. ومناك ضرب الچيلات أبفلس والأهل والجيران كله ملتمة والمزيقا أدگ والحبيبات كل وحدة لافة عبياتها على خصرها  ويهزن هز من هذا التمام.
وعمشة گاعدة على كرسي والوادم ورها ياخذون صور ويطشون عليها الملبس ، خو الهلاهل ما تسولف .. يايابة شلون فرحة..؟؟.
-الف مبروك عيوني..انشاءالله وراها أنشوفچ وزيرة تجارة كودن تنكة قراط وتفتهمين شكو ماكو بالسوگ وحركة التجارة!!.
-لاء عيني لاء انشاءالله وزيرة كهرباء.. لعد شلون هي مو أختصاصها كهرباء  لو غير شىء؟؟.
-أني أگول لو تستلم وزارة الداخلية أحسن لأنها سباعية و ماتخاف !!.
- شبيچن تخبلتن؟؟؟؟.. أصلا وزارة النفط لو المالية قالب عليها يا كهرباء و يا تجارة و يا داخلية؟؟..اسكتن يا معودات!!.
بيني وبينكم عمشة چانت تتمنى استلام حقيبة الصناعة و المعادن .. كودن راح تصير كل المعامل جوة أيدها من ضمنها معمل البستك!!.
وصارت عضوة و عضوة فعالة، هي صحيح ماتحچي بالأجتماعات ولكن كان عدها أسلوب تعلمتها من خلال بيع البستك ،بس أتخنزر عالوزراء وتهز براسها ، لذلك كانوا يرضوها و زايد ، ودگ كومشنات وواسطات حتى صارت تملك الملايين هذه عدى استيلائها على قصور وبساتين وغيرها وغيرها..
الواسطات من كل مكان.. الحرس بالباب وعمشة شايلة خشمها أموصيتهم :
ماكو مراجعة مواطنين كودن الأستاذة نايمة وتعبانة من أجتماعات المجلس ومالها خلگ تعالوا باچر!!.
خو زوجها الزاير ذب الدشداشة والعگال صار أفندي وفتح مكتب لأستقبال المواطنين وسماع شكاويهم وتسهيلات التعيينات في دوائر الدولة والدفع نقدي بالدولار .. ماكو دينار عراقي!!.
يايابة شلون زمن؟؟ (طاح حظچ يا أمريكا) شلون سلمتي بلد الحضارات بيد أم البستك وجماعتها؟؟.
عاشت الديمقراطية ، فعلا الشخص المناسب في المكان المناسب.. ياحكومة وبرلمان المنطقة الخضراء:
 تسعيركم الشلغم اثلج صدورنا ..سيروا على بركة الله !!.
أودعناكم عيوني الى سالوفة أخرى بأذن الله
أخوكم
رئيس التحرير
---------------------------
*حسنية أم الهلاهل هم نفس قصة عمشة تقريبا ولقبها(أم الهلاهل) هذه كانت تهلهل ينسمع من بعد مئات الأمتار لذلك كانوا يطلبوها بالحفلات حتى تهلهل ومرات تنسى نفسها تاخذلها گشه وهي تتمايل وأكيد كانوا يدفعولها خوش مبلغ (بالأخص الشباب!) هذه عدى البخشيش!!.
** حورية نخالة: هذه كانت تشتغل عند تجار الحبوب والطحين تنخل الحبوب چنها ماكنة، اشتغلت بنفس السوك اللي كانت عمشة تبيع بيها بستك!!.
                          

• < السابق
• التالي >