هذا الشرطي لازم يگطعون أيده

التفاصيل

تم إنشاءه بتاريخ الخميس, 04 آب/أغسطس 2016 15:49

كتب بواسطة: جلال چرمگا

       هذا الشرطي لازم يگطعون أيده

        

السرقة والرشوة شىء معيب في كل المجتمعات و اللي يقوم بهذه العملية سواء كان حرامي أومرتشي لازم ينال عقاب و عقاب صارم حتى يصير عبره لغيره والناس أدگوم تخاف و ما تتجرأ و تسوي هالشغلات.

أما نظرة المجتمع فأكيد نظرة حقيرة تجاه هؤلاء بالأخص مجتمع متحفظ و من العيب أن يسلك الفرد هذا السلوك.
بالمناسبة هي هذه الحالات موجودة في أغلب المجتمعات ولكن مجتمع مثل المجتمع العراقي وبالأخص بعد تحرير العراق و دخول القوات الأمريكية ووياهم نخبة خيرة وأصيلة من العراقيين الشرفاء ليحكموا العراق الجديد هذا الشىء من المستحيل أن يصير مطلقاً!!!.
الأخوة اللي اجوي مع قوات الشيطان الأكبر كلهم أشراف وعراقيين أقحاح وناس شبعانة أصلا ما مستعدين أن يسمعوا هالترهات.. رشوة ، أختلاس ، سرقة ..  تزوير .. وغيرها من الشغلات اللي ماقبل بيها الباري و الناس جميعا!!.
نور محمد على وجوههم.. شوفوهم زين، كل واحد لحية خفيفة ومحبس فضة بالأصبع ويصلي ويصوم وحاج مرات و مرات ،خو العمرة لاتسولفوها كل سنة مرتين و ثلاثة.
صحيح واحدهم مرات (مو على طول ) يضربلله بطل منكر و درزن شياش تكة و كباب و چم كاسة لبلبي و جاجيك بالثوم و يسهر سهرات وطگ أصبعتين و هز رگبة للصبح بس هذه مرة لو مرتين بالشهر للترفيه عن النفس بسبب التعب من جراء السهر وخدمة المواطنين الأعزاء!!.. لاء واحد يحچي ضميرة بقية الأيام والليالي بتاتا ما يتقربون من هالأشياء التي لايقبل بها الله ولا رسوله ولا كتابه.
خوأيام العاشوراء ( بهاي ..بهاي.. بهاي) واحدهم دشداشة سودة و طگاگية وتلگاه يخوط بالقيمة وهناك مصورين ما أدري منين أجوي يتلقطون بها لصور و مايلحگون..!!!.
وبالصدفة مواقع و صحف و مجلات ورقية تنشر هالصور.. طبعا هوالرجال ما يعرف بتاتا منهو اللي طگ الصور و منهو نشرهن و ليش؟؟!!.
نرجع لسالفة شرطي المرور:
گبل فترة شرطي مرور شايل كذا خيط على ذراعه ومسدس بكرة بحزامه تدني نفسه وياخذ من سايق تاتا ما أدري كيا مبلغ بحجة جوعان وتعبان وصارله كذا ساعة بالشمس ومشتعل ابو ابو!!.
بالله عليكم هذه صايرة؟؟ دايرة؟؟ شرطي ياخذ ثمن نص نفر كباب و شيش طماطة و گلاص لبن من أحد السواق المساكين؟؟
هذه شلون تحدث في بلد نظيف مثل العراق الحالي؟؟ يعني شراح يگول ؟؟ المسؤلين ( برلمانيين وغيرهم) مو حقهم واحدهم يشگ أهدومة من القهر؟؟؟
- الأخ رئيس البرلمان ينلام اذا طلب جلسة استثنائية للبرلمان لمناقشة هذه الحالة الشاذة؟؟.
- الأخ رئيس الوزراء مو حقه من يعاقب مدير المدير المرور العام ومدير مرور بغداد (الصوبين كرخ و رصافة) ويعاتب وزير الداخلية بشدة؟؟.
- مومن حق وزير الداخلية أن ماينام للصبح وكل ساعة ماخذلة حباية بارسيتول وخمصطعش قواطي بيرة وما يعرف شراح يجاوب الصحافة ومحطات التلفزة و زملائه وزراء الداخلية العرب على هذا العمل المشين كلش للوحة واللي تحدث لأول مرة؟؟... وقراره الأخير الأستقالة!.
- خو وزير التجارة الأسبق (عبدالفلاح السوداني) يگولك من سمع الخبر راد ينتحر ومامصدگ في العراق شرطي مرور ياخذ رشوة؟؟.
هو من كان وزير يتبرع برواتبه للفقراء في الكاظمية ويادوب يتغدى لفة فلالف من فالح أبوالعمبة بالكرادة والعشا گلاص شربت من جبار أبوالشربت وصمونة !! وكان لا سيارات دفع رباعي ولا درزنين حمايات ،الرجال رايح جاي للدوام عالبايسكل!!.
- السيد مقتدى الصدر( قدس الله سره) أمر سرايا السلام التحقيق وتشكيل لجان لمعرفة دوافع الشرطي على هذا العمل القبيح و أوصاهم:

على كيفكم وياه يا حبيبي قلبي نارك گرگوري!!.
- وزراء الكهرباء والدكتور الشهرستاني صارلهم كذا يوم مضربين عن الطعام وماراح يا كلون إلا يشوفون نتيجة التحقيق مع هذا الشرطي المرتشي!!.
- السيد الحاج أبو أسراء الورد ( المالكي) و نجله أستاذ أحمد (قدس الله سره) راح يتخبلون و الخبر مثل الصاعقة ضربتهم وفي نفس الوقت مرتاحين لأن هذه الشغلة صارت بزمن حكم العبادي ،هو من كان رئيس وزراء... ما سمع لابالرشوة ولا بالسرقات بتاتاً ومن أنطرد ،الخزينة المركزية كانت مليانة گواني دولارات للسگف والبقية حاطيها بالسطح ( كودن الغرف كلها مليانة و ماكو مكان)..!!.  
- النائبتان ( حنان الفتلاوي و عالية نصيف) لابسات أسود وعياطهن واصلة الى هذاك الصوب (أحااا.. أحااا) .. شلون يصير بعهدنا شرطي ياخذ رشوة؟؟ وينه هو؟؟ أنريد نخنكة بأيدينة!!... ملعون الوالدين ياخذ رشوة؟؟؟؟.
حنونة الفتلاوي بعلو صوتها: يعني شلون ؟؟ أشگ هدومي؟؟.
أتجاوبها عالية نصيف: ولچ ديري بالچ تسويها مناك النواب!! شراح يگولون علينا؟؟.
- وزراء الدفاع كلهم ( من حازم الشعلان الى العبيدي) أقسموا اذا ماتكون المحاكمة عادلة راح ينتحرون بأسلحة ثقيلة واباب الشرجي بساحة التحرير يوم مظاهرة مليونية!!.
- السيد بهاء الأعرجي معتكف بأحدى سراديب النجف و مايقبل يحچي مع أقرب الناس وحالف بالعباس مايضوگ الفسنجون ولا حلاوة النجف ولا طرشي كربلاء إلا بعد أنتهاء التحقيق!!.
- السيد صولاغ (تضامن وياه الدكتورعادل عبدالمهدي) مضرب عن الكلام وأيگول هيهات نرضى بهذه الأشياء المشينة!! ويقترح أن المرتشي يرجع المبلغ الى مصرف الزوية بالكرادة !! ، ولابد من القاء القبض على الراشي أيضا على شرط مالهم علاقة بالدبس!!.
حتى العراقيين اللي بالخارج واحدهم ما يستوعب هيچ خبر..بلد نظيف مابي ولا مسؤول حرامي كلهم ماشين على سنگة عشرة وهناك يجي شرطي مرور وياخذ الفين دينار رشوة؟؟ حالة غريبة في عراقنا الديمقراطي الحر كلش و من غير أية مجادلة.. ما صايرة ابدا!!.
- نائب الريس الأمريكي( بايدن) على أتصال مستمر ويه الرئيس العراقي (نسيت أسمه) ورئيس الوزراء ويحثهم على التأني وأن لايتخذون قرارات بعجلة وفي مكالمة مع رئيس المحكمة العليا ( هم نسيت أسمه) ترجا أن لا يكون الحكم بالأعدام ..ها الله هالله بعائلة الشرطي وأولاده السبعة!!.
- بان كي مون وبمؤتمر صحفي أبدي انزعاجه وتعجبه من الخبر اللي يحدث لأول مرة في عراق ديمقراطي نظيف من كل هالشغلات الوسخة!!.
- أمين عام جامعة الدول العربية يعرب عن أسفه للي حصل في العراق الديمقراطي !!.
- امين عام المؤتمر الإسلامي من سأله الصحفي گال: استغفر الله يعني معقولة هذه تحدث بالعراق؟؟.
ياجماعةالخير:
أني هم أتعجب شرطي تدني نفسه ويرتشي دولار ونص!!؟
ولك  أبو أسماعين! يا حظي والله لوأتطم روحك أحسن ،الجماعة سرقوا الجمل بما حمل ، كل خزينة العراق وبالمليارات وواحدهم يشوف نفسه مواطن شريف و سيد من سلالة طاهرة و مباركة .. والله العظيم راقصات الملاهي و(... الكلچية)  أشرف منهم بألف مرة..
مانعرف نتيجة التحقيق ولا الحكم اللي راح يصدر بحق أول سارق ومرتشي في عراق ديمقراطي تعددي تحرري حر..
عاشت الديمقراطية والموت للشيطان الأكبر .. و سلمتهم يا أم حسن!!.
أودعناكم عيوني الى سالوفة أخرى بأذن الله ..
أخوكم
رئيس التحرير

• < السابق
• التالي >