شنسوي ..؟؟؟

التفاصيل

تم إنشاءه بتاريخ الإثنين, 09 كانون1/ديسمبر 2013 19:52

مثنى عبيدة حسن

شنسوي

بطلنا نبيع ملابس وعطور وشعر بنات

ولا نعلك شموع وزينة ونسمع أغنيات

لا ألوان تلون شوارعنا والطرقات

نــگعد نتحسر بهالساعات

ممنوع علينا الابتسامات

وشلون يضحك وجه العراقية و العراقيات

إذا أخوها مذبوح غارق بالدمايات

زوجها مخطوف وما عدها دولارات

تفديه وتخلصه من العصابات

شنسوي

الأطفال نسوا فرحة العيد والمناسبات

بس يعرفوهن بزيارة المقابر والأموات

يگمزون ويلعبون وما يفهمون المصيبات

جايبين لعباتهم يشوفوهن للأخوات

اللي راحن بعمر الورد والزهرات

والحنة بيديهن وظافرات الكصيبات

أندفنن بصدرية المدرسة لأنهن شهيدات

يمه أختي ليش باقية تحت الترابات

ما ترد علي وتمسح الدمعات

مو والله مشتاك لأيديها الحلوات

تطعمني وتشربني المايات

ونمشي سوية هالمسافات

نسلم على أهل المحلة والخالات

وليدي أختك طير بالجنات

هناك عند رب السموات

تباوع علينا وترسل البوسات

تـــگلك يا خويه دير بالك على الباقيات

أمي والبنات الصغيرات

ما عدهن غير الله وأنت يا أبو الكلفات

يا ربي نجيهم من النازلات

شنسوي

وين نروح من هل المفخخات

نروح للجامع ونؤدي الصلوات

والكنسية بيها مريم والراهبات

نركض وراء الطوبة بالساحات

بالمدارس نــگعد على الرحلات

المريض نحمله للمستشفيات

البيوت الشوارع البنايات

كلها ما خلصان من الانفجارت

حتى السوك فرغ واحترگت المولات

لان عمي ما كو آمان بكل المكانات

خلينا كاعدين جووا هل الشيلمانات

بس الله يسترنا من الجايات

شنسوي

نتشهد كل يوم ونودع الأمهات

تگول عبالك رايحين للجبهات

نتلگه الصواريخ والراجمات

قصف الطائرات والدبابات

مو رايحين نقراء ونتعلم الكلمات

لو نشتغل ونچيب هل العلاكات

بيهن عشاء الأطفال والزوجات

شنسوي

يمه هذا منو بالصور المعلكات

على الحيطان وتحاچينه بالإشارات

وتاليها تبـچين بصنطه وتخنكچ العبرات

وتغنيلي دلالو يا الولد يا بني بالآهات

حس خالك يناديك من وراء الحجرات

يا يمه هذا خالك اللي هج بالولايات

بعد ما ضاك علينا الوطن بالاغتيالات

وبدل ما نركص بالأعراس والحفلات

صار العزاء بكل بيت واللطميات

يا ربي

يا ربي نترجك يا أبو الرحمات

تخلصنا من هالضيم والبلوات

وترجع الغياب ويحلى السمر والأمسيات

بالعراق .. بيتنا وخيمتنا المحروس بالدعوات

لأنه أبونا وأمنا ...نحبه حتى الممات

لأنه أبونا وأمنا ... نحبه حتى الممات



مهداة إلى أهل العراق الأحياء منهم والأموات

ربنا يرحمهم ويخفف عنهم جميعاً

9 / 12 / 2013 م

الگاردينيا: الأخ ..أبا الحارث