حچاية التنگال ٣١٦٣

التفاصيل

تم إنشاءه بتاريخ الأربعاء, 16 أيلول/سبتمبر 2026 13:34

كتب بواسطة: د.سعد العبيدي

د.سعد العبيدي

حچاية التنگال ٣١٦٣

عمي تحركوا وزوروا كل الدول. بالحركة بركة، وبيكم خير ووقعوا مذكرات تفاهم. بس تعال جيب الي ينفذ هلگد مذكرات. بعدين ماكو واحد منكم يسأل وين صارت المذكرات السابقة؟ أشو الكهرباء والمي والطيران والصناعة والزراعة والتعليم الي توقعت حولها كومة مذكرات بالنازل. لأن المشكلة مو بالتوقيع، وانما بإدارة التنفيذ، الي بعض موظفيها يشتغلون لجهات ودول أخرى. مثل ما صار بمسألة أحد حلول مشكلة الكهرباء عن طريق المفاعلات النووية المعيارية الصغيرة، والي شكلت الها الدولة لجنة من كومة خبراء، أخذت موافقة اللجنة الدولية للطاقة الذرية، ودرست تجارب الدول، واتصلت بروسيا والصين وأمريكا وبريطانيا وفرنسا، وكلهم حبذوا، وأبدوا استعداد للمساعدة، لأن إذا توزعت على مناطق العراق تحل مشكلة الكهرباء وتصفية المياه لعشرات السنين. وبعد ما اقتنعوا وحصلوا عروض رفعوها لرئيس الوزراء لغرض الموافقة على التنفيذ، نامت يم موظف چبير في مكتب حيل چبير، وبعد سنة شافه بالصدفة أحد أعضاء اللجنة وسأله: أگلك رفعنالكم مشروع الكهرباء وين صار؟ جاوبه بكل وطنية "يضر بالغاز الإيراني". فيا سادة شنو فايدة التوقيع وانتوا نايمين ورجليكم بالشمس.