لو يعدموني مثل زلخا أباب الشرجي أظل أگول الحق و ما أخاف / ١٣

التفاصيل

تم إنشاءه بتاريخ الخميس, 09 تموز/يوليو 2026 10:17

كتب بواسطة: أبو حمودي البغدادي

أبو حمودي البغدادي

 لو يعدموني مثل زلخا أباب الشرجي أظل أگول الحق و ما أخاف / ١٣

- خير أبو حمودي أشو اليوم شايل جريدة رياضية؟؟

ايوالله ، انت تعرف شگد أحب الطوبة ولعبة الطوبة وحتى لواعيبنا.
- صحيح وأعتقد من مشجعي الزوراء.
لاوالله اني اشجع كل الفرق من الزوراء و الشرطة والطلبة والجوية كلها عندي يك حساب ولكن عندي منتحبنا اهم من الكل و اتابع مبارياتهم لحظة بلحظة وما أفوت ولا لعبة.
- هذه نعرفها بلاكد وين الجديد؟؟
الجديد يا محفوظ السلامة خساراتنا المخزية بكأس العالم.
- كلامك على راسي.
يا اخي ما اعرف شبيهم اشو امداريهم مثل ماي اللي بالصينية فلوس و جوازات دبلوماسية واراضي و بيوت واكراميات الناس المتمكنة و التجار والنتيجة هابياض وتريدني ما انقهر؟؟

-ما حچيت غير الصدگ.
شوف راح احچيلكم حادثة حقيقية حدثت بزمن الرئيس عبدالسلام عارف:
سنة 1964 فزنا ببطولة كأس العرب وأتذكر اخر شي تقابلنا مع المنتخب السوري وفزنا عليهم.
ولهذا طلبهم الرئيس عبدالسلام عارف حتى يكافئهم على هالفوز.
راحوا للقصر الجمهوري و استقبلهم الريس احسن استقبال و بينلهم هو شگد فرحان بهذ الكأس والنتيجة جا وكت المكافأة.. تعرفون شنهي الهدية؟؟.
- لا والله.
كل لاعب مايلي:
كارتونة مسحوق الغسيل (تايد).
تنكة دهن راعي.
عشر دنانير من الريس.
وبالمناسبة التايد وتنكة الدهن هدية من شركة الزيوت النباتية!!.
حامد فوزي (الله يرحمه) كان حامي هدف المنتخب و المعروف عنه يحچي ومايدير بال ، وجه كلامه للريس وگال:
سيادة الريس العشر دنانير قليل... شوية بحبحها!!!.
ضحك الريس وكال مايخالف اصرفولهم كل واحد خمصطعش دينار تستاهلون و اكثر!!!!!.
والله العظيم هذه حادثة حقيقية حچاها المرحوم حامد فوزي بگهوة بالفضل وامام العشرات.
والاغرب لواعيب قبل ماكانوا متفرغين للطوبة وبس ، واحدهم عامل لو موظف لو عسكري واليوم اللواعيب امدللين و متفرغين بس لعب وادگولي ليش امدلغم.
-كل الحق وياك عيوني ابو حمودي ، تعال ياولد جيبنة كم استكان حامض و على حسابي.. ويجي واحد يگولك ليش تحنون لزمن الماضي الجميل؟؟.