مقارنة بين طاقة السعادة وطاقة البؤس !!!

التفاصيل

تم إنشاءه بتاريخ الثلاثاء, 17 شباط/فبراير 2026 15:12

كتب بواسطة: سيف الدين الألوسي

سيف الدين الألوسي

مقارنة بين طاقة السعادة وطاقة البؤس !!!

وتشمل تلك المقارنة دولا وشعوب وأفراد وعوائل واسماء.. الخ !!!
دول ممتصة كل طاقة السعادة. والراحة والرخاء من دول أخرى ... ومثل بعض الدول الحايرة لسباقات الخيل والحفلات وعدد الخدم والحشم والأموال وقسم منها يضاف له الجو النظيف والبيئة المنتقاة وبلية حسد مثل سويسرا والنمسا والإمارات وقطر وعمان وفنلندا ونيوزيلندا وفيجي وجزيرة تنگه ( تونغا ) وغيرها من الدول السعيدة والراسها بارد !!
واكو دول ماخذه كل طاقة البؤس والطيحان الحظ والفگر وحايرين أهلها بكلشي من الزقنبوت للامان للعلاج الخ ، ومثل السودان واليمن السعيد جدا ومالي وأوكرانيا ووووووو اسماء كثيرة لا داع لذكرها !!!
نرجع على شعوب سعيدة ومتونسة ورغم فقرها نوعا ما ومثل اليونان ودك زوربا للصبح وكوبا ودك ركص والأرجنتين وحيث دك تانغو وعاصمتها بوينس ايرس وترجمتها للعربية الهواء العليل .. حيث بوينس عليل أو منعش وايرس هواء ... البنجرجي من ينزل هوه التاير بالارجنتين يكول الايرس فاش !!!
واكو شعوب تشتري الحزن والفگر والشكوى شراء مزمن ولا تحمد ربها وتشكره على غنى أرضها وتاريخها ومثل بلاد ما بين القهرين والأرجنتين الشرقية وليبيا ونيجيريا وبلاد الإسكيمو !!!!
واكو عوائل يأتي أولادهم للدنيا وبحلكهم اربع خواشيك ذهب ومصاصة برلنط !! أمثال عوائل روكفلر وروتشيلد والبوهلتون ووووو غيرها ولا نريد أن نجيب اسامي خوفا من الحسد !!
واكو عوائل كاتلها الهبري والضيم وابنهم اول ما يولد ينطوه مميه مرهميها على رأس بطل شابي مطكع مخطان !! وبعدين ولد الخايبة تكضي عمرها تدور بالزبل قواطي وبطالة شيش ومثل عوائل كثيرة بعدة دول وحتى باميركا وأوروبا المليانة اليوم بالهوملسية والچوبليسية وووووو !!!!
واكو أفراد مجنصين يلزمون الفشقي يصير ذهب بريحة ألمي ورد والصندل وهم لا علم ولا فهم !!وبيوتهم وقصورهم بالريفيرا وبالكاريبي وكل واحد عنده يخت يجيب بيه ترتيبات وزو !!!
واكو كل صماخ ودكتوراه وعالم مكاعد حظه ، وكاعد بشقة تلاثين متر بالدقي ويركض وره الكيات لو مهاجر بأرض الله الواسعة لأن بلده طارد للاوادم والكفاءات وكاعد ببيت كنج ايجار بمدينة درجة حرارتها عشرين جوه الصفر .. ويكرب من ساعة ستة الصبح للسبعة بالليل حتى يدبر عيشة أهله وبيته وتربية أولاده !!!!
وووووووووؤووووووواكو فاشنيستات انكس من الارتستات يركبون سيارات هدايا بنص مليون دولار . واكو نسوان يلفون كبة ودولمة ويغسلون هدوم من الصبح لليل ولا حمدا ولا شكورا من رياجيلهم !!!!
ويكلك الطاقة لا تستحدث ولا تفنى من العدم !!
واشتعل ابو هيجي طاقة متخاف من الله .