فن مو سياسة !!!!!!!

التفاصيل

تم إنشاءه بتاريخ الأربعاء, 19 تشرين2/نوفمبر 2025 15:19

كتب بواسطة: سيف الدين الألوسي

سيف الدين الألوسي

فن مو سياسة!!!!!!!

بعد أن حلفت يمين ما احجي بالسياسة اليوم قريت موضوع عن الرسام الروسي الفرنسي شاغال وشنو گال على الانتخابات العراقية وكذلك عن صراع سلفادور دالي مع بيكاسو على ملكية بيوت ابن الخطيب في قرطبة وابن زيدون باشبيلية .. سلفادور يريد يحول بيت ابن الخطيب إلى محل قنادر وبيكاسو يريد يحول بيت ابن زيدون إلى إلى تلخانة مال قمار وسوالف مكسرة ورسم موديلات عارية !!! سلفادور دالي لم توافق على مشروعه جمعية المحافظة على جلود الثيران والزمايل وقال لماذا عندنا زمايل وثيران هواية وواصل القضية لمحكمة تمييز مدريد برئاسة القاضي الفريدو غوانسولوس ال كوستيليتو .. بيكاسو كالوله لتظل سرسري ويومية جايب موديل ماطلها مصلخة بين القمرجية والسكارى .. بطل من المشروع ورح يحول بيت ابن زيدون إلى اوتجي ابن زيدون !!!
العبقري الذي يتهمه البعض بالجنون وهو اعقل البشر فنسنت فان كوخ كال إذا بقت الدنيا هيجي قشمرة وعوجة رح اكص كلشي زايد بجسمي مو بس اذني ونعلة على صفحة كل نمونة جابوها واستنكوها الاميركان لتحكم بلاد حمورابي واشور بانيبال وسنحاريب ابو البار .. ساعة احجي وياه وانطيته باكيت ليبريوم ابو العشرة وتوسلت بيه عيني فان انت الكبير واكبر من هذه اللغاوي وترجيته أن يرسم بورتريت لسياسي عراقي عبقري على ضفاف الحبانية ويه الغروب !! قال لي امشي مخبل المن ارسم حتى وجوههم ممسوخة !!!! امشي لا اكص راسي !!! وإبليك !!!
اخيرا وبعد أن أطلع شاغال على المرشحين والفائزين بالانتخابات العراقية ،،، كام يلطم ويركع راسه بالحائط .. وگال اني مو شاغال .. أني زمال ابن زمال ....اني نعال ابن مليون نعال ،. وليتهمنه أحد بالتدخل بالسياسة ولعبة الأمم للقشامر والزواج .