حچاية التنگال ٢٦٦٧

التفاصيل

تم إنشاءه بتاريخ الخميس, 25 كانون2/يناير 2024 11:54

كتب بواسطة: د.سعد العبيدي

د.سعد العبيدي

حچاية التنگال ٢٦٦٧

لوما تصدر وزارة الدفاع توجيه وتعمم أمر الوزير بسجن ضابطين انتشر الهم فديو يبين بيه المقدم يضرب العقيد، ويطلع بيه العقيد يبچي مثل الجهال چان گلنه چذب، ومع هذا العقل لسه ما مستوعبها من صدگ، لأن ما موجود جيش بالعالم بيه الأدنى شقاوة حتى لو تمثيل وبيه الأعلى خرنگعي، حتى لو خنيوه ويحب التنكيل، ولا أكو قوات مسلحة بيها ضابط برتبة عميد يصوّرْ وينشر الغسيل، ولا أكو خريج كلية عسكرية عاقل بكل جيوش العالم يسوي هاي الدگه الناقصة، لأنه متدرب على الضبط، ومتشبع بالقيم العسكرية الي تستند على الاحترام والتقدير الخاص بالتراتب العسكري.
لكن شنگول لجهل أهل السياسة الى ضربوا المؤسسة العسكرية والأمنية وما زالوا يضربوها بسچاچين لمن جابوا دمج، وخلوهم بالمؤسسة وهمه بالأصل جنود أو ما مكملين ابتدائية، ولمن رجعوا آلاف المفسوخة عقودهم للمؤسسة، وهمه بالأصل مخالفين وهاربين، ولمن خلوا الجيش أشبه بالشايب كله ضباط صف ونواب ضباط، وترسوه ألوية وفرقاء.
ولو ما يفيد الحچي، لكن نگول هم الحمد لله وزارة الدفاع تصرفت بشكل صحيح لمن أحالت المقدم والعقيد لمحكمة عسكرية، حكمتهم بنفس اليوم بالسجن والطرد، بلكت يصيرون عبره للغير.