المسنات ،، تعبير لاهل الريسز من اهل الاول

سيف الدين الألوسي

المسنات ،، تعبير لاهل الريسز من اهل الاول

كل اعضاء ورواد نادي المنصور العريق سابقا كانت تربطهم رابطة قوية بالريسز المجاور له ،، وبسبب وقوع حديقة نادي المنصور على ساحة السباق مباشرة ورؤية الخيل والجوكية من قريب وحتى سماع مذيع الريسز للارقام واسماء الخيل والجوكية ،، جميع الاعضاء وخصوصا في حدائق نادي المنصور الغناء المنعشة للنفس كانوا يتجمعون ايام الخريف والشتاء المشمسة وخصوصا ايام الجمعة والاحد والاربعاء وكعوائل ومعهم اطفالهم للاستمتاع بمشاهدة سباقات الخيل والغذاء واحتساء الفريدة والامستل الزينة مع الجبس الناهي والفستق وقبل الغده ،، والنسوان والاطفال دك كوكا وكراش وببسي وكندا دراي (كنت احب الكندا دراي الاحمر) البارد وطبعا سيد الصنوف السينالكو العظيم وزملاؤه السڤن اب والميرندا و مشن اوف كاليفورنيا وهو مموجود لا بكاليفورنيا ولا باميركا والڤانتا و تراوبي وشابي اشرب على حسابي !

نرجع لايام الجمع الظهرية بنادي المنصور
قليل من الاعضاء و اللي مايخافون من نسوانهم ومو كمش عل التيغة يلعبون ريسز ونسوانهم تشجعهم
البقية يشجعون الخيل من موقع ادنى !
الشباب والشابات والمراهقات والمراهقين ملتهين بشغلات مهمة جدا اكثر اهمية بذاك الوكت من متابعة حمية وضرغام وبلوبرد وسينيورا ومنصور وردة وزمام ودرة فاروق ووووو وسعد عبد الله وحسين عبد الواحد وتركي عطية والمرحوم فريد عطية الذي دهسته الخيل بعد سقوطه من الحصان ، والرائد داود هاشم وجورج واكد اللبناني ووليد رستم ووووو غيرهم ! من الجوكية المميزين ان ذاك !
نرجع لسالفتنا مال المسنات !!
كنا نحن مراهقي هذاك الوكت نسمي بعض العجايز والمتصابيات بالمسنات وكذلك بعض المتصابين بهذاك الوكت ،،
والمسنات ترمز للخيول والافراس المسنة والمبابيهم خير حظ للفوز سابقا ولاحقا بسبب ضغوط الحياة ومبادؤها التي لا يستغنون عنها ! وتهجيرها بين الطوايل وعدم الاعتناء بصحتها ايام الشباب من تدخين وشرب وسوالف مكسرة وسهر وعسكرية وووووووووو امور اخرى كثيرة !
كانت هدة او شوط المسنات الخسرانات اخر هده بالسباق واليوم وقبل مغيب الشمس بقليل ، ولمسافة خمسة اثمان الميل وهي اقصر مسافة بالريسز وينطوهم حبة جوه اللسان ويجيكون الضغط والسكر ومرات يسوولهم ايكو وتخطيط قبل السباق !!!
اني والقسم الاكبر من ربعي صايرين مثل هدة المسنات هذه الايام ،، بس رح يسولنه المسافة ١٠٠ ياردة فقط والخسران يباع لابو النفط لو لابو الغاز لان حتى للربل مننفع!
وديخ ديخ ،،، امشي ولك لا تحرن !
وعمي عغبنجي كن صعد الصقف كن الشمس غح تخنقني !
الف رحمة عليك يا يوسف العاني الخالد
تحياتي للشباب والعجايز الاصغر مني ، كل المحبة للجميع

  

إذاعة وتلفزيون‏



الأبراج وتفسير الأحلام

المتواجدون حاليا

466 زائر، ولايوجد أعضاء داخل الموقع