باصات ايكاروس !!!

 بقلم سيف الدين فاروق الالوسي

باصات ايكاروس !!!

وهي باصات استوردت على ما اتذكر اما سنة ١٩٦٩ او ١٩٧٠ ،، وهي صناعة مجرية ،، استوردت في زمن المرحوم علي احسان حمدي مدير عام مصلحة نقل الركاب ان ذاك .

كانت نوعين باص عادي وباص اوركوديون ،، ونسبة الجلوس قليلة جدا بالنسبة للوقوف وكان معظم الركاب واكفين ومجلبين بالسيورة المدندلة من سكف الباص ،، والجالسين اما شياب او عجايز !!!
طبعا بالصيف والخنكه والدعج ريحة الصنان تكتل !!!
واذا صعد واحد مطوخ گبل يوم ريحة الباص كلها تصير ريحة كحول اثيلي واذا تشعل شخاطة يوج الباص !!
كانت الايكاروس الباصات المفضلة للصرمپارية !!
تلگي الصرمپارية كل واحد واكف وره بنية وبعدين يترزل لو منها لو من واحد مسوي روحه وليم تيل ايكاروس !!
اكو جان طلاب دبنغية راسبين عدة سنوات ومعبروا الاعدادية وربعهم الشطار دخلوا كليات ،، فكانت طريقة استصرامهم هي شيل كتب مال كليات مثل ثوماس للرياضيات او ديفدسون وقسم شايلين صداري على اساس همه بالطبية وقسم تي سكوير على اساس همه ديداومون بهندسة بيركيلي !!! طبعا هذوله الصرمپارية المخسزية ميعرفون حتى وات از يور نيم !!! وبعدين من يوصلون للميدان يشربون شربت عند زباله وكلمن يرجع للبيت ولمختبره حتى يسوي تجارب من موقع ادنى !!!!!
الباصات ايكاروس تعبت بسبب الحر وكلها بيچت امر من حظي ،، وقسم تمشي وتطخطخ بالكاع من الثگل الا ان تم تبديلها بمنتصف السبعينيات ببصات ليلاند الانكليزية ومن ثم باصات مان الالمانية والاثنتان ام القاطين !!!
هسه الصومپارية العتك الباقين اكيد متهجولين بعد ان استشهد العديد منهم في الحروب ،،
هسه ماكو صرمپارية مهنيين!!!!

  

إذاعة وتلفزيون‏



الأبراج وتفسير الأحلام

المتواجدون حاليا

548 زائر، ولايوجد أعضاء داخل الموقع