حچاية التنگال ٢٦٢٩

التفاصيل

تم إنشاءه بتاريخ الجمعة, 11 آب/أغسطس 2023 08:59

كتب بواسطة: د.سعد العبيدي

د.سعد العبيدي

حچاية التنگال ٢٦٢٩

عدنا المسؤول خاصة بمستوى وزير وفوگ، يختلف عن المسؤول عند العالم. المسؤول هناك، من يختاره الحزب الفائز بالانتخابات يختاره على مبدأ الشخص المناسب في المكان المناسب، وهذا المناسب من يستلم المسؤولية عنده خطة يمشي عليها، حسب برنامج الحزب الي فاز، وشكل الحكومة، وخلاه مسؤول. بينما هنا ما يجي المناسب، لان كلمن ينتمي للحزب أو المليشيا، ويكون قريب من الابي هو مناسب ويصلح لكلشي حتى لو چان (...)، فممكن البنچرجي ولا صغر بيه، يصير وزير، وممكن البصونچي يصير رئيس مؤسسة، وممكن القاضي يصير رئيس مخابرات(تريد أرنب أخذ أرنب، تريد غزال أخذ أرنب).

والأرنب هنا ما يگعد راحه، لازم يسوي شي حتى يطلع من خانة الأرنبة ويصير مناسب، ولأنه ما يگدر يصير بالشغلات الكبار، فيعوفها ويروح على الطگطوگيات، فمثلاً يترك نظريات التعلم واكتساب المعرفة والمناهج الحديثة، ويروح على مدارس الجهال يعزل البنات عن الولد، وچماله وين ما يگعد يحچي بالموضوع ويعتبره انجاز. هسه انت مخلي گورك وگور الجهال اشراح يصير اذا اختلطوا وعرفوا بعضهم، وافتهموا وقارنوا أرواحهم وهمه جهال مو أحسن ما يطلعون غشمه لو وحوش من يكبرون.
تدرون ببغداد جانت أكوا مقهى سويسري مختلط سنة ١٩٣٤.
وتدرون يكثر الشذوذ لمن يقل الاختلاط.