مصلح نص ردن !!

سيف الدين الألوسي

مصلح نص ردن !!

مصلح السيارات باميركا يلبس جفوف ويجيب وياه رمبه بلاستيك يصعد السيارة عليها ويفرش نايلون جوه السيارة وغراضه مرتبة وبسيارته الورشة المتنقلة ، ويستعمل الايفون لريسيت دماغ السيارة !!! طبعا هذا مصلح وفيتر مهندس عراقي طور روحه ويه الزمن والناس تنتظره لاخلاصه وفهمه ونزاهته هنا في ميتشيغان ،، تحية له.
اتذكرت قبل ٢٥ سنة ببغداد وحيث ابني كان لديه سيارة رينج روفر موديل ٨٨ مال مزاد حكومي وكيرها الاوتوماتيك كام يعلس ،، فنصحونا بفيتر من الحلة الفيحاء ،، اجه الوردة ونام جوه السيارة وليص الكراج هيدروليك ودهن ،، ونزل الكير وفصخه ومعرف يرجعه وطلع سطلة براغي زايدة وكعد الگير بعد ان لغه اللو كير وصكد الكير وكام يعلس بالتبديل وبعدين چب سطلة بانزين بالبلوعة كان يستعمله للتنظيف وورث جكارة وصفن على الكير وكال هذا عيب بالتصميم ثم شمر الجكارة بالبلوعة فحدث انفجار بلوعي سفتيتنكي مهول بسبب البخار المتولد من البنزين قضى على شكو صرصر بمجاري المنصور ،،
وطار قبغ السفتيتانك ومعه الاف الضحايا من الصراصر المربرة الحمرة ام شفايف بوتكس جنان ،،
وهذا فيتر وذاك فيتر ويكلك ليش ترامب يغار من العراق !!!

  

إذاعة وتلفزيون‏



الأبراج وتفسير الأحلام

المتواجدون حاليا

492 زائر، ولايوجد أعضاء داخل الموقع