كل يوم انفجار

التفاصيل

تم إنشاءه بتاريخ الثلاثاء, 06 آب/أغسطس 2013 15:01

مثنى عبيدة

كل يوم انفجار
أريد أحچي قصص وأشعار
بين انفجار وانفجار ... انفجار

نگعد وأنام على انفجار
صبح ومساء ويه ينكضي النهار
دمنا مسفوح بليه اختيار
ما تعرف داني من عمر من علي من عمار
كلها ركبت قطار الموت بلا تذكار
شنگول للأمهات وأيتامهن الصغار
أصبرن حتى يثمر الصبار ؟

كل يوم انفجار
وبين انفجار وانفجار ... انفجار
الله وأكبر صار اللحم طشار
حالنا يصعب على الكفار
ما نعرف وين نروح من الانفجار
حر .. جوع .. ضيم.. وفوگاها انفجار
يذوب البشر بدرجات الانصهار
شلون البركان من يثور وينهار
يا رب رحمتك من اللي جرى وصار

انفجار انفجار
عمي غرگت سفينتا بوسط الإبحار
ترى باعونا شلع للتجار
اللي ما يخافون الله ذولوا الفجار
أذا تريدون الصدك ... أقبضوا .. من العيار
ضحكوا علينا بالچذب والطلاسم والأسحار
وبالليل ينصب الكأس ويحله السمر والسمار
وولد الخايبة ينذبحون مثلا الأبقار
لا چنهم بشر من خيرة الأطهار
ولگم خافوا الله الملك الجبار

انفجار .. انفجار ..انفجار
كافي عاد كل يوم انفجار
مو صرنا مثل اللي ينتظر خطار
ولو أنفجار صار من أهل الدار
يروح ويجي بليه إخطار
مو احترگت أرواحنا ود نعيش الاحتضار
چانوا يسمونه أرض السواد والأثمار
صفينه ارض الخراب والموت والأخطار
ينعق بيها البوم ويعزف على الأوتار
كل يوم انفجار انفجار ......انفجار
والله حريمه .. العراق دون كل الأقطار
تتهدم بيوته وتصير كومة أحجار
البصرة .. الكوفة .. بغداد چانت أولى الأمصار
الدنيا تشوفها مثل الأقمار
بنورها تتعلم وتهتدي الأخيار
منبع الطيب والحكمة والأفكار
چانت حديقتنا مليانه بالورد والأشجار
تسگيها دجلة وفرات و يا نعم الأنهار
تحيى الزرع وتطيب الأعمار
أهلنا خير ورحمة .. تفيض مثل الآبار
الغيمة وين ما تسير محملة بالأمطار
خراجها يعود دنانير و ذهب مو هذا الدولار

انفجار انفجار ... انفجار
اگول لكل من يحمل دمنا وينفخ بالزمار
وين اللي گبلكم مو الزمن دوار
 
أخذوا منه العبرة والاعتبار
شوفوا وين المغول والتتار
ولگم خبتم وخابت أمانيكم والاختيار
لأن العراقي.. آي العراقيين رقم مموش أصفار
عدوهم قبل صديقهم بيهم أحتار
لأنهم أشراف ومن يومهم ثوار
هذول أحفاد سيد الأحرار
ما يدنك رأس ويموت واقف مثل الأنصار
مسلم ومسيحي وكل الأديان... ربهم ألهم أختار
أخوان متعايشين وللطائفية كل الاحتقار
آي للطائفية وأهلها كل الاحتقار

الحق منتصر على الأشرار
يكشفهم بساعة وتنفضح كل الأسرار
وشما طال بيهم الوگت وفجرونا بانفجار
لازم تشرق شمسنا على يوم ٍ بلا انفجار
وننشد وي أطفالنا لحياة ٍ بلا انفجار
عراق ٌ بلا انفجار .. عراق ٌ بلا انفجار
عراق المحبة والأخوة والازدهار
بإذن الله الواحد الستار
بإذن الله الواحد القهار

مهداة إلى أهلنا العراقيين الشرفاء الصابرين
الله يكون بعونكم ويحفظكم ويحفظ العراق
1/ 8 / 2013 م
مثنى عبيدة حسين