حچاية التنگال ٢٣٠٩

التفاصيل

تم إنشاءه بتاريخ السبت, 23 نيسان/أبريل 2022 09:41

كتب بواسطة: د.سعد العبيدي

                            د.سعد العبيدي

حچاية التنگال ٢٣٠٩

ما معقولة علمود السيد الحلبوسي ائتلف والتيار راحت الدولة الغميجة للاطار وجابت السيد رافع العيساوي من منفاه، وقدمته بيوم واحد للمحكمة، الي حكمت عليه بالبراءة من كومة تهم أبسطها أربعة إرهاب، وخلته بنفس اليوم يرجع لبيته وأهله وللفلوجة أساس انطلاقته السياسية والاجتماعية. واذا عاقل عقل هذا الحچي الثگيل معناتها:
لو العيساوي أصلاً بريئ من كل التهم، والجماعة كل هاي السنين يعبون بعقولنا چذب، وإذا بريء فعلاً لعد ليش هذا الظلم والافتراء من قبل نظام حكم يحكم باسم الدين.
لو أهل السياسة مادين اديهم ببطن القضاء للوحة، بحيث گام القضاء يحكم بما يريدوه ويتمنوه أهل السياسة، وهمه الي يحددون الأحكام.
وما معقوله كل هاي الدوخة والخبصة، وكل علامات الاستفهام الي انثارت حول الموضوع على مود يقدمون سياسي سني بالمناطق السنية وبالانبار بالذات گبال السيد الحلبوسي الي اكتسح الساحة وصار يركض على قبلة الزعامة بسرعة صاروخية. واذا واحد عنده اشوية عقل وعقل هذا الگول معناتها:
لو الخوال ما يردون السنة يبقون موحدين وماشين على طريق بدون طسات.
لو أهل السياسة رجعوا يآمنون بالله وصفووا نياتهم، وراح يسوون ديمقراطية العراق أحسن من لندن وباريس.
تره يا جماعة صدگ حيره لأن المسافة بين المعقول واللا معقول صارت بثخن الشعرة وهيچ مسافة ما تبقي عقل بالراس.