فرق نص قرن من الزمان!!!

                                                 

                         سيف الدين الألوسي

فرق نص قرن من الزمان!!!

قبل اكثر من نص قرن من الزمان وبالضبط سنة ١٩٧٠ ، خرج فيلم قصة حب او لوڤ ستوري ، من تمثيل ألي ماكغرو وراين اونيل ،،، وألي بنية من طبقة مجتمعية عمالية وسطى ،، اما راين فهو سليل عائلة ارستقراطية امورها عدله ،، كل اهله من خريجي جامعة هارڤارد ،، ويبدأ الحب ويلعن ابوه شو بيذل !!! وتصير القصة رغم معارضة الاهل الارستقراطيين لهذه العلاقة والحب لابنهم ،، ولكنه كان صامدا يخرب على ريحة ألي ووووو وخطية تمرضت وماتت بالسرطان من العين والحسد و الى بقية الفيلم واغنياته الحلوة الرومانسية والتي انتشرت في العالم مثل الكورونا ،، هذا الفيلم شاهدته بسينما الدورادو ببيروت ايام عزها ، وعندما كنت في عمر يخرب ويتكهرب على الرومانسية والحبيات ، وخصوصا عندما كانت بغداد وبيروت هي اكثر العواصم العربية احتضانا للحبيات ولعب الدانص الازك واللاطش وبسرعة١٠ كم بالساعة !!!
في الفيلم مشاهد والاحباب يتمرغلون بالثلج ،، وألي لابسة كلاو مال بيبيتها ابو مستلك ،، معثوثة ،!! وگامت تلعب بالثلج هي وسيد راين ،، وواحد يدحس ثلج بحلك اللاخ ،،ومتونسين ودك حبيات في كل المواسم ،، ونحن نگول لو هيجي الجو الرومانسي لو مينراد !،، شفايتلنه لو اكو ثلج ببغداد ،( چان طمسنه بالسيان والطين ) ،، المهم وره هذيج الايام والمراهقة والشباب وبعد ان اخرفينا وطرق العديد من احبائنا اناثا وذكورا وهم من اعمارنا ، ونحن ايضا بأنتظار الطرقة سونر او ليتر !!
جينه الى مدن شتائها ثلج ،،، وأعمار وأمراض لا تتحمل برودة اقل من ١٠ مئوي ،، مو يومية تعال شيل وووخر الثلج من يم البيت وفوك السيارة الطامسة بالثلج ،، وتعال دوس بالثلج ساعة ورجلك وقدمك تجمد وبعدين تزرك ،، عبالك گاعد ببنجوين !!! وتعال سوق مثل مره عجوز بزمن الاول ،، تمشي بسرعة ٢٥ كم والستيرن لازك بيها ،، وكل ما تبدل گير تدك هورن وتضرب بريك !!! اني بالثلج والبلاك ايس ( الفريزنغ سيان ) اسوق على مهلي وامشي على مهلي مثل كمال الشناوي بس بلية شادية !!!! والطريق كله اسب بلوڤ ستوري والثلج وكلمن يحب الثلج ،،، وخصوصا نحن شياب وعجايز اليوم ، المراهقين قبل ٥٢ سنة !!!
هسه حتى ابطال لوڤ ستوري ، اكيد كلمن حاضن چيس مي حار ونايم من السبعة ،، ودك ........ وغازات للصبح !!!!!

  

إذاعة وتلفزيون‏



الأبراج وتفسير الأحلام

المتواجدون حاليا

581 زائر، ولايوجد أعضاء داخل الموقع