يواش يواش ،،، كورميميش ،، اسقمبيل ،،

التفاصيل

تم إنشاءه بتاريخ الجمعة, 21 كانون2/يناير 2022 07:45

كتب بواسطة: سيف الدين الألوسي

                         سيف الدين الألوسي

يواش يواش ،،، كورميميش ،، اسقمبيل...

كلمات بغدادية منقرضة كما انقرض الكل ،،، سمعتها البارحة من صديق ارمني بغدادي ترك بغداد قبل ٤٥ عاما وبقيت هذه الكلمات في ذاكرته واستعملها بكثرة عند الحديث معي !!! ،، واعتقد قسم منها تركي بالاصل ،، المهم حلوة ،، لغة عجايز وشياب الاول والذي انضم لهم جيلنا اليوم ،،، وسافسرها للاجيال الجديدة ولمن لا يعرفها .

يواش يواش : كنا نستعملها بكثرة ايام زمان ،، تعني على كيفك ،،، مثلا تقول للسائق الارعن يواش يواش تره رح ننگلب !!!!!،،،او الحماة تقول لابنها يواش يواش ويه مرتك خطية لتلح عليها ويومية مسويلها جمبش !! ،، على اساس هي تموت عليها !!! ،، او المفتش بالمدرسة يقول للمدرس يواش يواش ويه الطلاب ،، خطية هذوله لاكهرباء ، ولا فلوس عد اهاليهم !!!!
بس محد ينصح ونصح ساسة العراق سابقا واليوم وگاللهم يواش يواش ويه الناس ، تره رح يسلگون اجدادكم والتأريخ ،،الاسود اقرب برهان ،، القريب والجديد،، ورح تشوفون الما شايفيه وسامعين بي گبل !!!

گورميميش : وتعني المشايف وابن الفگر ، وكانت تقال الى اللگامه والجوعية من يچيتون على الاكل والفواكه ،، قابل انت مشايف اكل لو اثاث ذهبي لو سيارات وساعات !!! ، وبلغة اليوم النيو لانكويج البغدادية ،، الطاگين اهل السيارات والبيوت والاثاث ،،واللي علچهم ترس حلگهم !!! ويا مكثر الگورممشيه في العراق والعالم اليوم !!!

رؤوساء دول اكبر كورممشيه ،، وفنانين كبار ،، اما ملوك الگورممشيه فهم ابواق الساسة والاحزاب والدول !!!

اسقمبيل : وتعني ورق اللعب ،، وكانت تعني عند اهل بغداد لعب البوكر والكونكان وخصوصا عند بعض عجايز الاول اللواتي يلعبن اسقمبيل او الكونكان ،،
واليوم الدنيا لعبت بينا اسقمبيل ،، وكل سنة خابطينه ومسوين گصه جديده!!!!
ويواش يواش ويه اجيالنا المقبلة بقوة على الخرف والراحة الابدية !!!!