هاپي لايف وسويتي دريمز !!! اسم محل !!! مفتح رسمي !!!

                                                 

                         سيف الدين الألوسي

هاپي لايف وسويتي دريمز !!! اسم محل !!! مفتح رسمي !!!

قرب سكني في كلنتون تاون شب بقضاء مكومب ،،، يوجد طريق روعة،، يمر ببيوت غاية في الجمال وانهر صغيرة وملاعب خضراء واشجار باسقة ،، ومساحات خضراء مليانه طيور وسناجب وحتى غزلان وشموع ودموع !!!

جذب انتباهي بناء صغير ،،لا هو محل كماليات ولا هو ليكور ستور اي بالمفرد المختوم ، ولا هو بايسكلچي ،،، ولا هو محل دوندرمة ،،، مقنزع وحيدا بين البيوت الجميلة والمساحات الخضراء والاشجار والانهر ،،
هذا المحل بيه دخول سيارات وشباك لدفع الفلوس وشباك للتسليم ومثل السفري مال برغر كنغ وماكدونالد وساب وي وغيرها ولا يوجد به خدمة داخلية ،، كله تيك او وي !! او تو غو ، او سفري !!! ،، والسيارات لازمة سره عليه وازدحام من صباحيات رب العباد ولغاية نص الليل ،،، عدة مرات افوت مناك واشوف هذا السره مال السيارات وكلمن محضر فليساته وواكف ينتظر بفارغ الصبر حتى يجي السره !!
كلت لو ديوزعون بيض لو معجون تركي ماركة توسون ،، لو ديوزعون دجاج دو فرنسي!! ويمكن ديوزعون لحم برازيلي مال عجل ،،، لان ،،ماكو هيجي سره ، عبالك سره مال بنزين وكت الازمات !!
صار عندي فضول وكلت خللي اشوف هذا شديبيع ؟؟؟؟ لان الاشياء اللي ذكرتها وتصورتها وكتبتها ،متوفرة بكثرة بالاسواق وارخص من سوك الجملة ، وخصوصا الدجاج واللحوم والبيض والمعجون !!!
نزلت ده اسأل فد واحد هتكان ومهتلف ويرول وكل قلاقيله واكعه امر من حظي وهو بمنتصف الاربعينيات من العمر ،، چان لازم سره هو وسيارته البك اب الدودج موديل ٩٣ المليانة زنجار وطعجات !! ولابس شورت صارله ستة صيفيات ممغسول وتي شرت مجولح ومجولك !!! ،،، سالته ،، فدوه حجي ،،، هنا شكو شديبيعون !!!
باوع علي بازدراء وتهكم وكأن سؤالي فطير جدا ،، وگاللي ،، لويش دتسأل ،، الزم سره حالك حال البقية واشتري حتى تطير بارتفاعات عالية وتتصور روحك سيد مكاوي !!!
افتهمت السالفة لاحقا ،، هذا المحل يبيع تويت او ماريوانا ،، بمختلف اشكالها ،، معبئة بصورة جكاير او سيگار ، او علج مثل علج الميوه مال كبل ،،او نستلة او لقم !!!
ضليت صافن على زماني وكلت الحشيش بالعالم صاير موده بدلا عن العرك بالصوده !! ولهذا السبب من كل خمسين واحد الگي بس واحد صاحي ،، والبقية لو يحچون ويه نفسهم لو يرگلون مثل تاير خالع السيم مالته ،، لو خربانين من الضحك على ليلى والذيب !!!! وعبالهم ليلى اخت سلمى ويوسف !!!!!!!!!
وعشنا وشفنا وبعد نشوف ،،، حشش واضرب مسگوف !!!
وخلفله مليون مرة على الاسكنجبيل سيد الصنوف بامتياز !!!!!!

الأبراج وتفسير الأحلام

المتواجدون حاليا

500 زائر، ولايوجد أعضاء داخل الموقع