منزول فيفي والتكة !!!!!

التفاصيل

تم إنشاءه بتاريخ السبت, 02 تشرين1/أكتوير 2021 06:43

كتب بواسطة: سيف الدين الألوسي

                            سيف الدين الألوسي

منزول فيفي والتكة !!!!!

رهان من عشرين شيش تكة عند مجيد أبو التكة الف رحمة على روحه !! من سوالف زمان !!!!! التأريخ شتاء ١٩٧٥ !!
في احد أيام الخميس من شتاء سنة ١٩٧٥ وكنا مجموعة من الاصدقاء سهرانين في حفلة في نادي العلوية لفرقة كنار الارمنية الروعة ،،، في الساعة الواحدة بعد منتصف الليل ، كلتلهم للجماعة ،،، خللي نروح ناكل تكة عند مجيد ((( مجيد رحمه الله ، سائق تكسي شوفر ٥٤ عل الكفاح او شارع غازي ،، بعد أن يبند او يكمل شغله بالتكسي ، لديه مطعم سفري صغير جدا بمساحة ٤ م مربع في الفرع المجاور لسينما النصر ومقابل الملهى الصيفي والشتوي نسيت اسمه ، كان من ملاهي الدرجة العاشرة ،،، وحتى ارتستاته غاديات بركونده ومرحلات للمحافظات من صدك وكلهم مسنات ، ومعظمهن مصريات بهذاك الوكت !!! ،،،، مجيد كان يجلب عدة افخاذ مال لحم الهرفي وخضورات روعة ويفتح ساعة عشرة ويخلص اللحم والمعاليك ساعة ٣ ويعزل ،، ليبدأ يومه في التكسي ثاني يوم ساعة ٣ عصرا ،،، وهو خال نص الاسكنجبيل الابيض العصرية سيد الصنوف ،،،يشرب ويسولف ويشوي !!! الف رحمة على روحه . ))) .
براس الشارع اكو بيت نزل لارتيستات هذا الملهى والملاهي القريبة وكانوا مصريات ولبنانيات درجة عاشرة !!!،، طبعا اني جنت شوية مقندل ، وكلت الى جماعتي والى مجيد ، رح اروح ادك الجرص على هذا البيت وخللي شي يصير يصير ، وهمه يتراهنون ،، متكدر اتسويها !!!! كلتلهم اتراهن من عشرين شيش تكة ومنها خمسة لية ،، اروح ادك الباب !!!
ضحكنا ،، ورحت دگيت جرص البيت القديم والجرس ابو النتله من زمن اديسون !!
طلعللي واحد گدع نص ردن ، گتله بكل ثقة فيفي هنا !!!! طبعا فيفي اقتبستها من الافلام المصرية ،، تفاجئت بجوابه ،، ايوه يا باشا ،،، اءلها مين ؟؟؟
جاوبته كللها صديقج في ملهى اللونغ بيتش بحمدون بلبنان وما ادري شلون طلعت من حلكي !!!!
المهم دخل وبعد عدة دقايق طلع هو ووحدة مصرية تشبه اليز مرت بوباي مصوفره !!!جنها قمجي عزرائيل !!!وطلعت من الباب وهي تصيح مش مصدءاك يا حبيبي !!!!!!! انا فيفي !!!! كلتلها ، بابا ليش تجذبين ،ومنين تعرفيني !!!!!!!!!!
كلتلهم بابه اني دكيت جرص غير باب ،،،. هذيج فيفي تشبه لبنى عبد العزيز ، هيه صفنت ، المصري يركض ورايه ،،، ايوه دي فيفي السمره بكره بتيكيني !!!!كتله شنو ابتليت بلوه !!!! بكره حضر مشمش مش عاوز فيفي !!!! واني خربان من الضحك ويه جماعتي ومجيد ،،، وكتله لمجيد ، رحمه لاهلك سويله عشر لفات سفري مال الرهان للمصري ،، الذي عاف البيت واجه كعد على تنكة الصبغ ماركات ارمسترونغ والحديثة والوردة الحمراء ،، الكراسي السفري لاهل التكة بهذاك الوكت ،، يمنه !!!!!! وبالشقه كتله سويلنه جاي من اييد فيفي !!! ورجعنه للنادي والربع يسموني ابو فيفي القمجي !!!!
ايام لا تنسى ،،، مع كل المحبة للاصدقاء..