من غير زعل.. تحرير القدس ببناء المزيد من المولات و الكابريهات!!

                                           

                           جلال چرمگا

      

من غير زعل.. تحرير القدس ببناء المزيد من المولات و الكابريهات!!

بعد الأحتلال بكم سنة وبعد ما سيطرت المليشيات و العملاء والجواسيس على العراق صرنا انلاحظ العديد من الأمور ما كانت قبل..مثلا:

- الأستيلاء على املاك الدولة من عقارات و قطع اراضي أما بالقوة أو بتصريح من رئيس الوزراء و برخص التراب، مثلا باعوا جامعة البكر ما اعرف شكد مساحتها بسعر أقل من التراب ، وأكيد الأخ اللي اشترى هالجامعة راح يفلشها ويحولها الى مشروع تجاري!!.
وأكو حچي منا و مناك بالأستيلاء على منتزه الزوراء وتوزيعها على الأخوة النشامى لتحويلها الى مولات و ملاهي و بارات للسكر والعربدة وإعتداء عالمواطنين حتى مطلع الفجرِ!!.
- كثرة المولات في انحاء العراق (بين مول ومول مول جديد) وأكيد هذه المولات هم للمتنفذين من رجال دين واصحاب الميليشيات و اقرباء رئيس الوزراء ورؤساء الأحزاب بالأخص الأحزاب الدينية اللي يخافون الله كلش!!.
قبل كانت هناك عدد من الأسواق المركزية منتشرة بأنحاء العراق و هذه كانت مملوكة للدولة ( وزارة التجارة ) تبيع كلشي و كلاشي والأسعار مدعومة من الدولة وما بيها منافع شخصية.
حتى في وكت الحرب مع ايران كانت الأجهزة الدقيقة تبيع ساعات و اجهزة دقيقة وبعض الكهربائيات بأسعار رخصية جدا وكانت أغلبها ماركات عالمية.
المهم بذيچ الفترة كانت القوة الشرائية كلش زينة والمواطن بأمكانه أن يدخل للمعارض ويشتري اغلب اللي يريده بحيث ما تأثر على ميزانيته اذا كان موظف أو عسكري أو حتى الكسبة!!.
ياجماعة الخير:
اليوم أشوف العجب العجاب في انحاء العراق ، نعني مو بس المحافظات لاء حتى الأقضية والنواحي أنشوف ظاهرة المولات وكل مول بكذا طابق و روح أتفرج ما تريد وتشتهي من كل ألأنواع وألأصناف و بكل مول مطاعم وكافتريات!!.
هذه خوش ظاهرة ، و اكيد شىء حضاري و لكن غير المقبول هالكم الهائل!! والمن؟؟.
أشو الف ماشاء الله الشعب اغلبه يعيش تحت خط الفقر و الموظف والعسكري يادوب معاشه تكفي لمصاريف و ايجارات و مولدات عدى مطالب الأولاد و مستلزمات المدارس من ملابس و قرطاسية وموصلات وغيرها!!.
أني اعتقد واتمنى ان ما أكون مخطأ:
السيد الفلاني أو الشيخ الفلتاني بنى مول واتفق من حبايبه في ايران وترس المول مواد من كل نوع وصنف بالمقابل اكو واحد ينافسه ( الخير موجود ماشاءالله بالملايين ومرات بالمليارات ) نعني شعجب هذاك عنده مول بكذا محافظة واني ماعندي؟؟.
يالله يا شباب جيبوا مهندسين واراضي الدولة موجودة ابنوا كذا مول وبأسرع وقت وانتوا لجنة التجارة ( الله عليكم هذه احزاب لو شركات تجارة و مقاولات؟؟) هرولوا الى عمامنا بطهران وجيبوا عشرات الشاحنات واملوها بكل شىء!!.
وطبعا هذه ( اغلبها) دعم غير مباشر لعمامهم الأيرانيين بسبب اقتصادهم المنهار كلش (وان شاءالله ينهار اكثر ويوصل للصفر و تحت الصفر).
وصدكوني ... صحيح المول مليان بشر لكن ياترى كم النسبة من اللي جايين يشترون فعلاً؟؟.
وهذه ظاهرة خطيرة..شباب وشابات يشوفون هالبضائع و وواحدهم ماكو الف دينار بجيبه!! اكيد يتمنى يشتري ولكن منين يا حسرة؟؟.
أكيد يفكر الحصول على اي مبلغ وبأية طريقة حتى لو كانت مجازفة !!.
لذلك بسبب الوضع الأقتصادي بديرتنا نسبة كلش متدينة تشتري ولكن مع هذه وهذيج الجماعة مستمرين ببناء المولات وعلى عناد أمريكا و الرجعية واليمين المتطرف و عاشت الديمقراطية وملالي ايران و تلامذتهم وسواق الشاحنات ومروجي المخدرات والى الأمام الموت لأسرائيل والشيطان الأكبر!!.
لو بس اعرف شنو علاقة الشيطان الأكبر و اسرائيل وية تجارة عملاء ايران بهذه الشغلات والخزعبلات؟؟.
الجواب: حتى ينطوها صبغة جهاد و تحرير وطريق القدس يبدأ ببناء المولات وانتعاش جمهوريتهم .... و تسعيركم للشلغم أثلج صدورنا و الله أكبر و لاتخاذل بعد اليوم و الى الأمام!!.

   

الأبراج وتفسير الأحلام

المتواجدون حاليا

445 زائر، ولايوجد أعضاء داخل الموقع