مواقف صعبة في الكلية سابقا ، وفي الحياة ايام زمان !!!

                                                 

                        سيف الدين الألوسي

مواقف صعبة في الكلية سابقا ، وفي الحياة ايام زمان !!!

١- فتاة جميلة وطالبة في الكلية كاشخة ولابسه جعب عالي وهي تتمختر وتستعرض جمالها وعلى غفلة ينعوج الجعب وتنلوي رجلها ،،، وكل الواقفين يصيحون الله ، الله ، الله !!! والله خطية انكسر بوطها !!!
٢- واحد ديفتر على مدارس البنات بالسيارة ويشحط وسيارة جديدة ،، وهناك يركعها بتكسي شوفر ٥٨ جدمة وتسقط السيارة ، والبنات يضحكون عليه !!!
٣- وحدة كاشخة ودتطلع وهي مخطوبة مثلا واخوها الصغير يلزك علج بشعرها !!
٤- وحدة ملابسه زي موحد ويجب ان تنزع البلوز الاحمر بباب الكلية ،، ومن تنزعه تتطلع الباروكة ويه البلوز !!
٥- واحد دينتظر الدرجات والاستاذ تكلم بالانكليزي وكال من الدرجة الاقل الى الاعلى توزيع الاوراق وافتهم بالعكس ، فصاح الطالب فرحان باعلى حسه نعم !!! كاله زيرو !!!!
٦- واحد كاعد يقره الغزال ويه صاحبته ويجي اخوها ، يسوي نفسه اثول ديسأل عن عنوان مدينة الطب !!
٧- واحد مبردغ وكاشخ ولابس بينباغ جيفانتشي وتنجب عليه الشوربة بالمطعم !!
٨- واحد راكب خيل وبطل بالفروسية ، يدعو حبيبته لمشاهدة سباق الطفر فوق مانع وبعده حوض مي !!! يطفر من المانع وينزل بالمي ، والحصان يطلع وهو يبقى !! والناس تضحك !!!
٩- استاذ دينطي محاضرة ويتريع تريوعة اصلية !!!! عبالك شارب طن صودا !!!
١٠ - واحد ديلحك وحده بالسيارة وفات رونغ سايد ووكفه الشرطي واخذ اجازته !!
١١- واحد ديسولف ويه ربعه بالسيارة اللي بصفه وفرحان و بالازدحام ، ويوكف السير وكبل بالسيارة الكدامة !!!
١٢- واحد ديسوق وياه الحب ، ويفوت زنبور بالسيارة من الجامة المثلث والدنيا مطر ودك تنعوص وشناتير عبالك انضربوا كيمياوي !!
١٣- واحد كاعد ويه الحب وتطير جمرة الجكارة لتزرف نفنوفها الجديد الجايبته من بيروت !!!
١٤- واحد يكص براس اصدقاوه بانه يشرب بطل ويسكي ولا كانه ، وبعد استكان بيرة يكوم يحجي قصايد بالانكليزي !!
١٥- واحد ديطلع حفلة ومشتري قندرة روغان جديدة !! ويلبسها اخوه ويطلع ومن جان هو ديغسل ويغني دكي دكي يا ربابة !

كل الود لجميع الاصدقاء عسى نسيان ماسينا اليوم للحظات .

   

الأبراج وتفسير الأحلام

المتواجدون حاليا

510 زائر، ولايوجد أعضاء داخل الموقع

تابعونا على الفيس بوك