الوكت بهذا الزمان السعيد !!! فانتاستك وامييزنغ كولت هيلاري !!!

                                                

                         سيف الدين الألوسي

الوكت بهذا الزمان السعيد !!! فانتاستك وامييزنغ كولت هيلاري !!!

الواحد حاير بهذا الزمان شلون يكضي وكته !!! ملينه من لعب الغولف والتنس ،، وركوب الخيل وصيد ابن آوى وغزال الرنه ،،، وهوكي الجليد والتزحلق على الجليد والماء !! ولعب الباليه !!!
ومجاملة الحسناوات في لعب السنوكر والبريدج والبلاك جاك!!!
والتفرفر باليخوت في الكاريبي وجزيرة تونغا وحوض المتوسط وبانيو البيت !!!
والموازنة بين الحفلات الموسيقية الشرقية والغربية والسيمفونية ،،، وحضور مسرحيات شكسبير والريحاني ،،،، وكذلك حضور حفلات التانغو والفالص والجاز للوي ارمسترونغ ،، وحفلات طم خريزة !!!!! اما السينمات فقد مللنا من الافلام المعتبرة فيها !!! وعند الظهيرة فسباق الداربي للخيول الاصيلة ، وسباق الكلاب وسباق البزازين العورة المضروبة صچم بعينها !!!!
اما المطاعم فهوسه وازدحام والواحد مابيه حيل يروحلها وليصير بي كورونا لو كورولا وكامري !!!!
الافضل الواحد يكضيها تأمل على نقيق الضفادع ، وصفنه على زمانه ، واكل ونوم حتى يحصل على الدبلوم !!!!
او يظل الواحد مثل الچذبه والطرن ،، يتفرج قنوات سخيفة واخبار تعيسة ووجوه ممسوخة ومحللي مختبر وسياسة يعرفون چم كلمة يعيدون ويصقلون بيها،، الى ان يسطروك حتى تنجب تنام ، ومثل هذا ابو قناة العربية المحلل ،،اللي يحچي عربي مكسر ويكول رح يزرب زربة محل يضرب ضربة !!!وغيره من النمايم اللكامه !!!!!
واذا الواحد يضوج من كل هل اللغاوي ،، يفتح الفيس بوك او حايط المبكى ليقرأ اخر اخبار الموت ونشاطات عزرائيل !! ،، ومن ثم يروح طاير لينچب ينهمد و ينام وحتى يحلم بصوفي مارسو من يعضها الجلب ويضربها ابرة الن ديلون ،، لو بميرڤت أمين من يحودها حسين فهمي بعوامته على النيل وبعدين يصلح غلطته !!!،، وبعدين يفز من نومه ، ويكعد على القريوله مسطور ،، ويورث جكارة ويصفن على ساعة السوده وعلى هذا الزمن الجميل ابو عيون الزرك الحوله .
تحياتي للجميع واوقاتا سعيدة
 

  

الأبراج وتفسير الأحلام

المتواجدون حاليا

468 زائر، ولايوجد أعضاء داخل الموقع