مو خوش حلم !!! سبحان الله !! ليلة وفاة نادية لطفي !!!!!

                                         

                         سيف الدين الألوسي

       

              

مو خوش حلم !!! سبحان الله !! ليلة وفاة نادية لطفي !!!!!!

قبل كم يوم تفرجت فيلم قديم ابيض واسود بقناة روتانا كلاسك وكما هي هوايتي ،، وكانت بطلة الفيلم المرحومة نادية لطفي ،،، ويمكن الفيلم اسمه المرأة ذات النظارات السوداء ،، وتطلع خاله تمويه نظارات وليس للضرورة مثل سيد مكاوي وعبد الستار الطيار !!! الله يرحمهم !! 

   

سبحان الله البارحة حلمت بناديا لطفي وهي گاعدة بصفي بالسيارة من چانت شابة ورايحين دنتعشى بمطعم يلدزلار ببيروت على صخرة الروشة والبحر المظلم !!وسيارتي چانت شوفرليت امبالا ٦٥ زرگه ميتالك !!! ودنسمع ما يطلبه المستمعون من الاغاني الغربية من صوت اميركا !! والدنيا شته وباردة ودتمطر زخ ،، وبصفتي جنتل مان ابو النعلجة ،، طبكت السيارة گبال اوتيل مرحبا بالفرع المجاور ليلدزلار ،، ونزلت كبلها فكيت الامبريللا او الشمسية ، والزخ فوگانه وهي لابسه ابيض وچعب عالي ،، ومن دنركض انكسر الجعب مال قندرتها ،، وكلتلها ،، الله وعمى !!!! ،، المهم وصلتها للميز مالتنه على الشباج المطل على بحر الروشة وچان گاعد صديقي المرحوم ابو وحيد ومعه مريم فخر الدين ، وعبد السلام النابلسي وزينات صدقي وچانت گاعده بالمطعم لابسه شفقه ،، وحسن فايق وتحية كاريوكا وصباح ورشدي اباظة ،،!! گلتلها گعدي ولتظلين تنقين ،، هسه اخابرلج محل كالدي لقنادر النساء بالحمره ،،، يجيبولج قندرة ديليفري لمطعم يلدزلار !! ،،
رحت خابرت گالدي وجابوا قندرة وره نص ساعة !! المهم چانت گعده حلوة ودگ بيكات ، وابو وحيد طوخ وگام يغني تركي ، وخابرنه طروب ، وجتي وره ربع ساعة ،، ودگ مزات من الزينة ،، وعرأ اول باب ، وچيرز ،،، وروثمان ومارلبورو احمر اصلي ، وزينات چانت تشرب كاميل ،، وبعدين تعشينه اكل تركي حيث النسوان اكلوا كباب اورفيلي وططر قولاغي وحسن فايق برده بلاو ،، واني وابو وحيد وعبد السلام النابلسي ،، طلبنه اشكمبه شوربه وپاچه وكراعين اضافية !!!!!
و بعدين طلعنه من يلدزلار كلتنه والدنيا زخ وباردة ،، ورحنه شربنه چاي يم أيلي اخو طوني الچايجي جوه العمارة ،، وفريد كسر الاستكان ، چان مطوخ !!
وأيلي يگله ، حبيب البي ولا يهمك !!!
رجعت ويه ناديه ده اوصلها لاوتيل الكارلتون ( فلشوه ) ،، وگبل متبوسني بوسه بريئة !! فزيت من النوم ، بسبب البروستات الكشرة للذهاب الى الادب ،، وتعوذت من الشيطان الرجيم !!!
صبحت الصبح ،، سمعت بأن الله اخذ امانته وبأن نادية لطفي ماتت ،، گلت شنو اني عزرائيل !! حتى بهل الحلم الحلو مگعد حظي !!
كلها من وراج ماجدة ،، وج البريمز ،، رح تضمينه كلنه للمنتخب !! وتاخذينه وياچ !!!!
الف رحمة عليچ نادية بنت لطفي ،، رح اصلي صلاة الوحشة على روحچ. ولان الزينين كلهم هاجروا الى العالم الثاني !!!!!!!!!!!! ومبقى بالدار بس اهل السياسة !!!!!!!
وعمت عين الگاع. شتلم !!!!!!!! والرايح مودعينه والجاي متلگينه !!!!! وحسب انظمة پال وسيگام لحياتنا المخربطة !!!!!!

الأبراج وتفسير الأحلام

المتواجدون حاليا

415 زائر، ولايوجد أعضاء داخل الموقع